गृहमन्त्री रामबहादुर थापाले देशमा मध्यावधि चुनाव हुने हल्ला गलत भएको बताएका छन् । केही दिनयता सञ्चारमाध्यम तथा भएका पछिल्ला घटनाक्रमका कारण सरकार ढल्ने, नयाँ सरकार गठन हुने र मुलक मध्यावधि निर्वाचनमा जाने समाचार बाहिरिएको भन्दै उनले देश मध्यावधि चुनावमा जाने विश्लेषण गरिनु गलत भएको बताएका हुन् ।
पोखरामामा गण्डकी प्रदेशको आन्तरिक मामिला तथा कानुन मन्त्रालयले आयोजना गरेको प्रदेशस्तरीय सुरक्षा भेलामा नेकपा सचिवालय सदस्य समेत रहेका थापाले भने, ‘एमसिसी, सभामुख चयन र बाँस्कोटाको राजीनामालाई लिएर देश मध्यावधिमा जाने गलत विश्लेषण भएको छ ।’
‘देश मध्यावधिमा जाँदैन,’ उनले भने, ‘यी कुनै कारणले समस्या आउँदैन ।’ उनले पार्टी उपाध्यक्ष वामदेव गौतमलाई राष्ट्रिय सभा सदस्य बनाउने नेकपा सचिवालयको निर्णयलाई मन्त्रिपरिषद्ले कार्यान्वयनमा लैजाने स्पष्ट पारे ।
उनले भने, ‘पार्टीमा अहिले देखिएको विवाद भएको भन्दा पनि गराइएको हो ।’
