कास्की । ‘लिपुलेक’ कलाकृतिका लागि यस वर्षको ‘राष्ट्रिय ललितकला पुरस्कार’ पोखराकी अग्रज कलाकार मिलन शेरचनलाई प्रदान गरिने भएको छ । ललितकलाका विधामा उल्लेखनीय योगदान पुप्याउँदै आएका स्रष्टाहरूलाई ललितकला प्रज्ञा–प्रतिष्ठानले विभिन्न विधामा पुरस्कृत गर्दै आएको छ ।
यही वैशाख २ गतेदेखि हुने भनिएको ‘राष्ट्रिय ललितकला प्रदर्शनी–२०७७’ बन्दाबन्दीका कारण स्थगित भएपछि सङ्कलन भएका कलाकृतिहरूको मूल्याङ्कनका आधारमा उनलाई ६० हजार राशिको सो पुरस्कार अर्पण गरिने प्रतिष्ठानले विज्ञप्तिमार्फत जनाएको छ ।
उनी ‘हानानो ओशिवाना’ अर्थात् झारपातबाट सुन्दर चित्र बनाउने कलाकारका रुपमा परिचित छिन् । उनी भन्छिन् 'यो निकै गर्विलो पुरस्कार हो, जो कोही कलाकारलाई यो पुरस्कार पाउन चाहना हुन्छ, मेरो पनि थियो पाएँ, निकै खुशी छु', उनीसहित कास्कीका अन्य दुई स्रष्टाले विशेष र प्रादेशिक पुरस्कार प्राप्त गर्न सफल भएका छन् ।
प्रादेशिक पुरस्कारतर्फ कास्कीका दलबहादुर गुरुङले प्राप्त गरेका हुन् । उनले ‘प्रतिस्थापन’ कलातर्फ २५ हजार राशिको पुरस्कार पाउन सफल भएका हुन् । विशेष पुरस्कारमा जिल्लाकै बाबुराम बस्ताकोटीले ‘जिम्ती’ कलाकृतिबाट २५ हजार राशिको पुरस्कार प्राप्त गरेका छन् ।
एक लाख रुपैयाँ राशि रहेको यस वर्षको ‘राष्ट्रिय अरनिको सम्मान–२०७७’ शङ्करनाथ रिमाल र सन्तकुमार शाक्यलाई प्रदान गरिने प्रतिष्ठानले जनाएको छ । त्यस्तै ‘ललितकला राष्ट्रिय लेखन पुरस्कार–२०७७’ लय मैनाली र ‘ललितकला राष्ट्रिय पत्रकारिता पुरस्कार–२०७७’ केशवराज खनाललाई प्रदान गरिनेछ । प्रतिष्ठानले विभिन्न विधामा मूल्यांकन गरी दुई दर्जनभन्दा बढी पुरस्कृत हुने स्रष्टाको नाम सार्वजनिक गरेको हो ।
प्रतिष्ठानले जारी गरेको विज्ञप्तिका अनुसार कोभिड–१९ ले गर्दा स्थगित भएको ललितकला प्रदर्शनीलाई अनलाइन वा अन्य कुनै वैकल्पिक माध्यमबाट सञ्चालन गरिने भएको छ । कोरोना सङ्क्रकणबाट सुरक्षित हुन अहिले भौतिक उपस्थितिभन्दा अनलाइन माध्यम नै उपयुक्त हुने प्रतिष्ठानका कुलपति केके कर्माचार्यले बताए ।
