पोखरा : अक्सिजन आवश्यक मात्रामा आपूर्ति नभएपछि पोखरामा सात जना संक्रमितको ज्यान गएको छ ।
पश्चिमाञ्चल क्षेत्रीय अस्पतालमा पोखरामा अक्सिजन अभावमा सात जनाको मृत्यु भएको हो । अस्पतालमा हाई फ्लोको अक्सिजन आवश्यक रहे पनि सो हुन नसक्दा एक रातमै उनीहरूको मृत्यु भएको हो ।
पछिल्लो तीन दिनयता अक्सिजनको आवश्यकता बढी भएका बिरामी आइरहेको तर अक्सिजन आपूर्ति अनियमित भएकोले समस्या परेको अस्पतालको भनाइ छ ।
क्षेत्रीय अस्पतालमा ८० बेड क्षमताको आइसोलेसनमा बिरामीको उपचार भइरहेको छ । विरामीको चाप बढेपछि बिहीबारदेखि प्रतिदिन तीन सय ८० वटासम्म सिलिन्डर आवश्यक भएको छ ।
प्रदेशकै ठूलो सरकारी अस्पताल भए पनि उसको आफ्नै अक्सिजन प्लान्ट छैन । अस्पतालले पोखराका निजी उद्योगबाट अक्सिजनको जोहो गर्दै आएको छ ।
अक्सिजनको अभावमा मृत्यु हुनेमा तनहुँका ३ जना, म्याग्दी, पर्वत, कास्की र स्याङ्जाका १/१ जना छन् ।