काठमाडौं । राप्रपा अध्यक्ष डा. प्रकाशचन्द्र लोहनीले कोरोना संक्रमणपछि अस्पताल भर्ना भएका पूर्वराज दम्पत्तिको शीघ्र स्वास्थ्यलाभको कामना गरेका छन् ।

सामाजिक सञ्जालमार्फत अध्यक्ष लोहनीले पूर्वराजा ज्ञानेन्द्र र पूर्व बडामहारानी कोमलको स्वास्थ्य लाभको कामना गरेका हुन् ।

लोहनी संवैधानिक राजसंस्था र हिन्दु राष्ट्र पुनर्स्थापनाको अभियानमा रहेका नेता हुन् ।

भारतको हरिद्वारमा भएको महाकुम्भ मेलामा सहभागी भएर पूर्वराजदम्पत्ति अघिल्लो साता स्वदेश फर्किएका थिए । त्यसलगत्तै गरिएको स्वास्थ्य परीक्षणमा पूर्वराजा ज्ञानेन्द्र र पूर्वरानी कोमललाई कोरोना संक्रमण भएको पुष्टि भएको थिए ।

पूर्व राजदम्पत्ति उपचारका लागि आज थापाथलीस्थित नर्भिक अस्पताल भर्ना भएका थिए । त्यस्तै पूर्व अधिराजकुमारी प्रेरणा पनि आजै सो अस्पतालमा भर्ना भएकी छन् । अस्पतालका कर्पोरेट कम्युनिकेशन प्रमुख सोमनाथ बाँस्तोलाले तीनैजनाको स्वास्थ्य अवस्था सामान्य रहेको जानकारी दिएका छन् ।