काठमाडौं । विश्व स्वास्थ्य संगठन (डब्लुएचओ)ले एसिया प्रशान्त क्षेत्रमा कोरोनाविरुद्धको खोप आउन एक वर्षसम्म कुर्नुपर्ने बताएको छ ।
योसँगै नेपाललगायत एसियाली मुलुकले कोरोनाविरुद्धको खोप आउन समय लाग्ने सम्भावना बढेको छ । खोपको विकास र प्रभावकारिताको अवस्था अझै परीक्षणकै क्रममा रहेको जनाउँदै बिहीबार संगठनले सो कुरा बताएको हो ।
डब्लुएचओका क्षेत्रीय निर्देशक डा. ताकेसी कासाइले इन्डोनेसियाको राजधानी जाकार्तामा पत्रकारहरुसँग कुराकानी गर्दै यस क्षेत्रमा खोप आउन ६ महिनादेखि एक वर्षसम्म लाग्न सक्ने बताएका हुन् ।
