चितवन । भरतपुर अस्पतालमा कोरोना संक्रमित गर्भवतीको मृत्यु भएको छ ।
तनहुँको शुक्लागण्डकी नगरपालिका घर भई हाल मकवानपुरको हेटौंडा–५ बस्ने ३३ वर्षीया महिलाको बिहीवार बिहान उपचारको क्रममा मृत्युु भएको हो ।
स्वास्थ्य अवस्था थप जटिल हुँदै गएपछि ती महिलालाई बुधबार भेन्टिलेटरमा राखेर उपचार गरिएको थियो ।
गत असोज ३० गते कोरोना संक्रमण पुष्टि भएकी महिलामा खोकी, श्वासप्रश्वासमा समस्या थियो ।
उनी ३७ हप्ताको गर्भवती भएको अस्पतालका सूचना अधिकारी लिलाधर पौडेलले जानकारी दिए ।
बुटवलमा दुईको मृत्यु
बुटवल धागो कारखानामा सञ्चालित कोरोना विशेष अस्थायी अस्पतालमा दुई जना कोरोना संक्रमितको मृत्यु भएको छ ।
रुपन्देहीको तिलोत्तमा नगरपालिका–४ का ८१ वर्षीय पुरुष र अर्घाखाँचीको पधेरीका ३८ वर्षीय पुरुषको मृत्यु भएको हो ।
कात्तिक १ गते कोरोना संक्रमण पुष्टि भएपछि अस्पताल भर्ना भएका ८१ वर्षीय पुरुषको गएराति १२ बजे मृत्यु भएको अस्पतालका सूचना अधिकारी डा. विष्णु गौतमले जानकारी दिए ।
यस्तै असोज २२ गते कोरोना पुष्टि भएपछि अस्पताल भर्ना भएका अर्घाखाँचीका ३८ वर्षीय पुरुषको बुधबार राति साढे ९ बजे मृत्यु भएको डा. गौतमले बताए ।
