उदयपुर ।विराटनगरस्थित कोशी अस्पतालमा एक पुरुषको मृत्यु भएको छ ।
उदयपुर बेलका नगरपालिका–१ का ५५ वर्षीय वेदप्रसाद न्यौपानेको मंगलबार बिहान मृत्यु भएको अस्पतालका मेडिकल सुपरिटेन्डेन डा. चुमनदाल दासले बताए ।
न्यौपानेलाई बेलकाबाट उपचारका लागि सोमबार राति विराटनगर ल्याइएको थियो । मोरङ बूढीगंगा गाउँपालिकामा रहेको विराट टिचिङ अस्पतालमा भर्ना गर्न खोजिए पनि अस्पतालले पीसीआर परीक्षणको रिपोर्ट नभएको भन्दै भर्ना लिन नमानेको बताइएको छ ।
विराट पुप्याउँदा उनलाई १०४ डिग्री ज्वरो पनि थियो । त्यसपछि कोशी अस्पताल ल्याइएको र उनको बिहान लगभग १ बजेतिर मृत्यु भएको डा.दासले बताए । न्यौपानेलाई केही दिनअघि जण्डिसको समस्या भएको परिवारले बताए ।
कोशीमा ल्याएर आइसोलेसनमा उपचारका लागि भर्ना गर्ने तयारी हुँदै गर्दा न्यौपानेको मृत्यु भएको बताए । ‘ज्वरो आए पछि उनलाई कोरोनाको आशंका गरिएको र आइसोलेसनमा राखेर उपचार गर्ने तयारीमा उनको मृत्यु भएको डा. दासले जानकारी दिए । अस्पताल पुगेको १५ मिनेटमा न्यौपानेको मृत्यु भयो ।
मृतकको स्वाब संकलन गरी परिक्षणको प्रक्रिया अघि बढाइएको बताउँदै दासले स्वाबको पीसीआर परीक्षण गरेर रिपोर्ट आइसकेपछि मात्रै ती पुरुषमा कोरोना भए नभएको पुुष्टि हुने जानकारी दिए ।
पीसीआर परीक्षण रिपोर्ट आइसकेपछि सबै पक्षसँग समन्वय गरेर शव व्यवस्थापनको प्रक्रिया अघि बढाइने उनले बताए ।
