चिनियाँ कम्पनीले उत्पादन गरेको नयाँ कोरोना भाइरस परीक्षण गर्ने किट्सको विश्वसनीयतामा अन्तर्राष्ट्रियस्तरमा प्रश्न उठिरहेकोबेला नेपाल पठाउने भनिएको दुई हजार थान किट्स नआउने भएको छ ।
तातोपानी भन्सार नाका हुँदै पठाउन लागिएका ती किट्स नपठाउने जानकारी चिनियाँ अधिकारीहरूले नेपाललाई गराएका छन् ।
स्वास्थ्य सामग्रीको गुणस्तरमा प्रश्न उठेपछि नेपालका लागि हिँडेको सामाग्री बीचमै रोकिएको हो । चीनले पठाउने किट्स लिन तातोपानी भन्सारमा स्वास्थ्य र कृषिका नेपाली कर्मचारी गइसकेका थिए ।
चीनको बेइजिङ साभान्ट बायोटेक्नोलोजीले २ हजार वटा कोरोना संक्रमण पत्ता लगाउने किट्स नेपाली दूतावासलाई उपलब्ध गराएको थियो । तिनै किट्स नेपाल पठाइएको थियो ।
कतिपय चिनियाँ कम्पनीको किट्सको विश्वसनीयता ३० प्रतिशतमात्रै देखिएको छ । स्पेनले चिनियाँ कम्पनीको किड्समा फिर्ता गर्ने निर्णय गरिसकेको छ ।
