यतिबेला नेपाली सिनेमा जगतमा बलिउड अभिनेता सुनिल सेट्टी आउने हल्लाले सिने बजार तातेको छ । नेपाली फिल्मका निर्देशक मुकुन्द भट्टले बलिउड अभिनेता सुनिल सेट्टीलाई नेपाली फिल्ममा अफर गरेपछि नेपालमा उनको अब बन्ने फिल्मको निकै चर्चा भएको छ ।
भट्टले केही समयअघि चलचित्र ‘एक्स ९’ निर्माणको घोषणा गरेका थिए । आफैँले निर्देशन गर्न लागेको यही चलचित्रका लागि सेट्टीलाई अफर गरेका हुन् । यस चलचित्रमा सेट्टीलाई खलनायकको भूमिका निर्वाहका लागि अफर गरेको निर्देशक भट्टले बताएका छन् । चलचित्रलाई लिएर सेट्टीसँग कुराकानी समेत भइसकेको उनले जनाएका छन्।
भट्टका अनुसार सुनिल सेट्टी सकारात्मक रहेका छन् । चलचित्रको शीर्ष भूमिकाका लागि अभिनेता अनमोल केसीसँग कुरा भइरहेको पनि भट्टले बताए । चलचित्रमा सौगात मल्ल, पुष्प खड्का, अनुप विक्रम शाही लगायतका कलाकार पनि शीर्ष भूमिकामा रहेर अभिनय गर्ने छन् । चलचित्रमा अभिनय गर्ने अभिनेत्रीको भने कुनै टुङ्गो लागेको छैन्।
समय सोचेजस्तो भएको खण्डमा तिहारपछि चलचित्र छायांकन थाल्ने जानकारी दिए । यसअघि पनि भट्टले फिल्म ‘लप्पन छप्पन’ र ‘लप्पन छप्पन २’ निर्देशन गरिसकेका छन् ।
