केही दिनअघि दोस्रो विवाह गरेकी चर्चित गायिका अन्जु पन्तको पछिल्लो गीत सार्वजनिक भएको छ । शुक्रवार सार्वजनिक गीत उनकै जीवनमा आधारित रहेको बुझिएको छ । ‘भर लाग्थ्यो तिम्रो सधैँ शङ्का गरिन माया, पराईको भइसक्यौ गर्न सकिन माया’ बोलको गीतमा अन्जुलाई अर्का लोकप्रिय गायक यम बरालले साथ दिएका छन् ।
बाध्यता बस पहिलो प्रेममा बिछोडिँदै अरूसँग जीवन बिताउनु परेको विषय गीतमा उल्लेख छ । जीवनयात्रा लामो र कठिन हुन्छ । यात्रा तय गर्ने क्रममा व्यक्तिले अतीतको समयलाई पनि फर्केर हेर्नुपर्ने हुन्छ । अतीतले नै व्यक्तिलाई वर्तमान र भविष्यतर्फ डोर्याउने काम गर्छ । बाध्यता बस अरूसँग जीवन विताउनुपरे पनि तर विगतको माया प्रेम भुल्न नसकिने प्रसङ्ग गीतमा उल्लेख छ। सो मर्मस्पर्शी गीतको रचना लोकप्रिय शब्द रचनाकार डीआर राईले गरेका हुन् ।
वरिष्ठ संगीतकार महेश खड्काको सङ्गीतमा रहेको सो गीतको भिडियोलाई साहित्यकार समेत रहेका हेम प्रवासले निर्देशन गरेका हुन् । श्रीदेब भट्टराई, शिलास्मा हमाललगायतको अभिनय छ । शिलास्मा पनि पछिल्लो समय नेपाली म्युजिक भिडियोमा चल्तीकी अभिनेत्री हुन् ।
