पछिल्लो समय काँठे लोक भाकामा एकछत्र राज गर्दै आएका गायक हुन्, सरोज लामिछाने । संचारकर्मी समेत रहेका उनले प्राय काँठ क्षेत्रका भाकाहरू गाउनेदेखि शब्द सिर्जना समेत गर्ने गर्दछन् । रेडियो जक्की (आरजे) बाट आफ्नो परिचय बनाएका उनी गायन क्षेत्रमा आए पनि संञ्चारकर्मलाई छाडेका छैनन् ।
नेपालको मध्य क्षेत्रमा बढी चर्चामा आउने काठे भाकाको दर्जनौँ गीत लामिछानेले यसअघि नै बजारमा ल्याइसकेका छन् । उनका अधिकांश गीत लोकप्रिय छन् ।
यस्तै पछिल्लो समय सामाजिक समस्यालाई लिएर उनले नयाँ गीत बजारमा ल्याएका छन् । कुनै दम्पतीबाट सन्तान नजन्मिनु पछाडि सम्पूर्ण दोष महिलामाथि थोपर्ने चलन नेपाली समाजमा छ ।
‘पुरुषमा पो कमजोरी छ कि ?’ भनेर स्वास्थ्य परीक्षण गराउने भन्दा पनि सम्पूर्ण दोष महिलामाथि थोपर्ने र अर्को बिहे गर्ने घटना समाजमा हुँदै आएका छन् । जसबाट महिलाहरू सामाजिक र पारिवारिक रूपमा प्रताडित हुन बाध्य छन् । यही विषयलाई उठान गर्दै गायक लामिछाने र सन्तोष लामिछानेको मौलिक लोकदोहोरी गीत ‘ख्याल मया’ सार्वजनिक भएको हाे ।
गीतको म्युजिक भिडियो सरोज लामिछानेको अफिसियल युट्युब च्यानल मार्फत सार्वजनिक भएको छ । गायक सरोज लामिछाने भन्छन् ‘दम्पतीबाट सन्तान हुन नसक्दा पारिवारिक र सामाजिक दबाब पछि श्रीमान्–श्रीमतीको सम्बन्ध कसरी बिग्रिन पुग्छ र श्रीमती कसरी अपहेलित हुन्छिन् भन्ने विषय भिडियोमा समेटेको छु । मेरो गीत रुचाउने क्षेत्रमा चेतनाको रूपमा पनि यो गीतले काम गर्छ भन्ने विश्वास लिएको छु ।’
गीतको भिडियोमा हाँस्य कलाकार कमलमणि नेपाल, शारदा गिरी, जानुका पौडेलको अभिनय छ । साथै गायक सरोज लामिछाने, मोडल एलिना रायमाझीलगायतको अभिनय छ । गीतमा सरोज लामिछाने, सन्तोष लामिछाने र सुनिता दुलालले आवाज दिएका छन् । सन्तोष लामिछानेको शब्द, सङ्गीत रहेको गीत नरेन्द्र वियोगीले एरेन्ज गरेका हुन् ।
