‘हेर यो मुटुमा चिरा पर्या छ,’ गीत टिकटकमा भाइरल भएको छ । यो गीतमा टिकटकमा अभिनय गर्दै धेरेले फेसबुकमा राखेका देख्न सकिन्छ । केही सातअघि युटुबमा अडियो राखेलगतै चर्चामा आएको यो गीतको भिडियो आइतबार मात्रै सार्वजनिक गरिएको हो । बादल थापाको शब्द, लय र स्वरमा सजिएको गीतमा पछिल्लो समयका चर्चित मोडल तथा र्यापर जिबी चिरन (चिरञ्जीवी सापकोटा) ले अभिनय गरेका छन् । भिडियो सार्वजनिक गरिएको २४ घण्टामै युट्युब ट्रेन्ङिमा ४० नम्बरभन्दा तल पुगेको छ।
आहा टिभी युट्युब च्यानलबाट सार्वजनिक भएको गीतले छोटो समयभित्रै राम्रो प्रतिक्रिया पाएको छ । गीतमा जिबी चिरनलानई थिएटरबाट मोडलिङमा आएकी रोशनी कार्कीले साथ दिएकी छिन् ।
लकडाउन फापेका कलाकार
जिबी चिरन अभिनय मात्रै गर्दैनन् उनी र्यापरसमेत हुन् । उनले तीन र्याप गीत गाएका छन् । सत्य घटना तथा समसामयिक विषयवस्तुमा गीत तयार पार्न खप्पिस उनको र्याप धेरैले रुचाउँछन् । जिबी चिरनले कोरोना रोकथाम तथा नियन्त्रणको लागि सरकारले लकडाउन गरेपछि ‘भाग कोरोना भाग’ बोलको गीत ल्याए । सो र्याप समयसापेक्ष भएकाले धेरैले रुचाए ।
लगतै उनले अर्को र्याप गीत ल्याए । सरकारले लिपुलेक भूमि समेटेर नयाँ नक्सा जारी गरेपछि सार्वजनिक भएको ‘इतिहास’ र रुकुम हत्याकाण्डपछि ल्याइएको ‘जात’ र्याप गीतले जिबी चिरनलाई थप चर्चामा पुर्यायो । यी तीनवटै र्याप गीत लकडाउनको अवधिमै सार्वजनिक भएका हुन् ।
टंक तिम्सिनाको गीत ‘के यो माया होइन र ?’ मा समेत जिबी चिरनले र्याप हानेका छन् । साथै, छिट्टै नै अर्को र्याप गीत ल्याउने उनको योजना छ। ‘अहिले बजारमा आएभन्दा केही फरक तरिकाबाट गीत र भिडियो ल्याउने विचारमा छु,’ जिबी चिरन भन्छन् ।
उनले दुर्गेश थापाको बिच्च बिच्च २ र बिच्च बिच्च ३ बेसार पानीमा अभिनय गरेका छन् । अघिल्लो साल सुपर हिट भएको ‘बिच्च बिच्चमा’को सिक्वेल पनि निक्कै चर्चित भयो । सातजना मोडलका बीचमा देखिएका दुर्गेश र जिबी चिरनको अभिनयलाई धेरैले मन पराए ।
नाटकदेखि म्युजिक भिडियोसम्मको यात्रा
केही कमेडी सिरियलमा समेत अभिनय गरिरहेका जिबी चिरन भिडियो जक्कीसमेत हुन् । रेडियो जक्कीको रूपमा लामो समय काम गरेका उनी फेरि रेडियोमा पनि कमब्याक हुने योजनामा छन् । सुर्खेत घर भएका उनको संघर्षको कथा निक्कै लामो छ । बाल्यकालदेखि स्कुलका हरेक कार्यक्रममा उनी सहभागिता जनाउँथे । त्यहीँबाट नाटकतिर खिचिन थाले । बिस्तारै उनलाई नाटकको रस लाग्न थाल्यो ।
स्कुलमा प्रत्येक कार्यक्रममा उनले नाटक गर्थे । बिस्तारै नाटक बुझ्न थाले । उनलाई नाटकको भोक थप जाग्दै लग्यो । अनि उनी सडक नाटकमा प्रवेश गरे । चेतनामूलक कथावस्तुमा ठाउँ ठाउँमा गएर नाटक देखाउन थाले । नाटक लेख्नेदेखि निर्देशनतिर पनि लागे । पुराना दिनहरू उनी सम्झिन्छन् ‘त्यति बेला नाटक पनि फिल्मजस्तो लागेको थियो । नक्कल उस्तै–उस्तै थियो । सडक नाटकमा त वरिपरि धेरै मानिस झुम्मिएर हेर्थे ।’
अनि भए,उदास बिन्दासको साथी
स्कुले जीवन २०६२–६३ देखि उनी नाटक क्षेत्रमा प्रवेश गरेका हुन् । उनले पछि रेडियो नाटकमा पनि आवाज दिन थाले । रेडियो नेपालको सुर्खेत प्रसारण केन्द्रबाट उत्पादन हुने रेडियो नाटकमा उनले लामै समय काम गरे । त्यही समयमा उनले सुर्खतकै रेडियोमा कमेडी कार्यक्रम गर्न गर्न थाले ।
चर्चित कार्यक्रम प्रस्तोता दिनेश डिसीको शैली ‘आवाजको दुनीयाको साथी’ को शैलीबाट जिबी चिरन प्रभावित भए । यसैले उनले पनि रेडियोबाट भन्न थाले ‘उदास बिन्दासको साथी जिबी चिरन’ ।
बाल्यकालदेखि नै केही नयाँ काम गर्न रुचाउने उनी चित्रसमेत कोर्थे । २०६६ तिर काठमाडौंमा भएको राष्ट्रिय चित्रकला प्रतियोगितामा उनि पहिलो भए । नाटक प्रतियोगितामा उनको समूह दोस्रो भएको थियो ।
यस्तै, उनी राष्ट्रियस्तरको वादविवाद कार्यक्रममा पनि दोस्रो भए । उनलाई तिनै अवसरले डोर्याएर काठमाडौंसम्म ल्यायो । पत्रकारिता र साहित्यका विद्यार्थी उनी पढाइसँगै पत्रकारिता र कलाकारिता क्षेत्रमा अघि बढिरहे । काठमाडौंमा अहिलेसम्म तीन चारवटा रेडियोमा काम गरिसकेका छन् । साथै, सफल कलाकार बन्नकै चक्करमा टेलिभिजनदेखि युटुबसम्मका कार्यक्रम गरेका छन् ।
भाइरलको हथकण्डा होइन मिहिनेत
बिस्तारै सामाजिकसञ्जालको प्रयोग र लोकप्रियता बढ्दै गयो । जिबी चिरनले आफूलाई चर्चामा वा भाइरल बनाउने नाममा कुनै हथकण्डा गरेनन् । बरु उनले मिहिनेत गरे । फलस्वरूप उनी लकडाउन यता सामाजिक सञ्जालमा छाएका छन् । उनका हिट भएका भिडियोहरु जति छन्, ती लकडाउनयताकै हुन् ।
अहिले उनीभित्र कलाकारिताको आत्मविश्वास बढ्दै गएको छ । आफ्नै मिहिनेतले उनी अगाडि बढ्दै आएका हुन् । त्यसलाई उनी सङ्घर्षको पर्याय दिन्छन् । उनी भन्छन्, ‘इमानदार र कामप्रति लगाव हुनेहरूले सङ्घर्ष भनेको केवल काममै अभ्यस्त नै रहेछ ।’
म्युजिक भिडियो र कमेडी सिरियलमा जमेका उनलाई ‘फिल्ममा खेल्ने इच्छा छैन ?’ भन्ने प्रश्नमा भन्छन्, ‘पर्दा समाएर माथि उक्लिन जो पनि चाहन्छ । राम्रो कथा र पात्रमा अभिनय गर्ने मौका मिल्यो भने अवश्य गर्नेछु ।’
