बलिवुड अभिनेता इरफान खानको स्वास्थ्य अवस्था बिग्रिएपछि उनलाई मुम्बईको कोकिलाबेन अस्पतालको (आइसियू) मा भर्ना गरिएको छ । उनको स्वास्थ्य अवस्था किन बिग्रियो र उनको समस्या के हो र आइसियूमा किन भर्ना गरियो, अहिले यसबारेमा कुनै जानकारी सार्वजनिक भइसकेको छैन ।
अस्पताल स्रोतले इरफान खानको स्वास्थ्य अवस्था बिग्रिएको र आइसियूमा भर्ना गरेको बाहेक अरु जानकारी दिन मानेका छैनन् । इरफान खानका परिवारले पनि अधिकारिक रूपमा अरू केही बताएका छैनन् ।
स्वास्थ्य धेरै बिग्रिएको कारण इरफानलाई आइसियूमा भर्ना गरिएको एक नजिकको स्रोतले नाम नबताउने शर्तमा भने ।
गएको वर्ष सन् २०१९ मा इरफान खान लन्डनमा उपचार गराएर फर्किएपछि कोकिलाबेन अस्पतालका डाक्टरको रेखदेखमा रहेका थिए । ५४ वर्षीय इरफान न्युरोएन्डोक्राइन ट्युमरबाट पीडित छन् । उनी विदेशमा यो बिमारीको उपचार गराइरहेका थिए र भर्खरै मुम्बई फर्किएका थिए ।
फिल्म ‘अङ्ग्रेजी मिडियम’ का क्रममा उनको स्वास्थ्य स्थिति बिग्रिएको बताइन्छ । यस कारण कैयौँ पटक सुटिङ नै रोकिएको थियो । जब इरफान खान राम्रो भएको महसुस गर्थे तब सुटिङ हुन्थ्यो । भर्खरै मात्र इरफान खानकी आमा सईदा बेगमको जयपुरमा निधन भएको थियो ।
लकडाउनका कारण इरफान खान आफ्नी आमाको अन्तिम संस्कारमा सहभागी समेत हुन पाएनन् । उनले भिडियो कलमार्फत उपस्थिति जनाएको बताइएको छ ।
