केशाव भट्टराईको निधनपछि रिक्त रहेको चलचित्र विकास बोर्ड अध्यक्ष पदको लागि आवेदन माग गरिएको छ । मंगलवार एक सुचना जारी गर्दै सञ्चार तथा सूचना प्रविधि मन्त्रालयले अध्यक्ष नियुक्तिका लागि आवेदन मागेको हो ।
आवेदन दिँदा बोर्डको वर्तमान अवस्था, सवल तथा कमजोर पक्ष र भावी रणनीतिहरु बुँदागत रुपमा पेश गर्नु पर्ने उल्लेख गरिएको छ । उम्मेदवारको व्यावसायिक कार्ययोजना, कार्ययोजनाको प्रस्तुतीकरण र अन्तर्वार्ताको आधारमा नयाँ अध्यक्ष चयन गरिने सुचनामा लेखिएको छ ।
बोर्ड अध्यक्ष हुनका लागि ३० वर्ष पुरा भएर ६५ वर्ष ननाघेको नागरिक हुनुपर्ने छ । कुनै पनि बिषयमा स्नातक पास गरेका र चलचित्र क्षेत्रमा १० बर्ष विताएका व्यक्तिले आवेदन दिन सक्नेछन् । प्रविणता प्रमाणपत्र तह उत्तिर्ण गरेर चलचित्र क्षेत्रमा २० बर्ष बिताएका व्यक्तिले पनि आवेदन दिन सक्नेछन् ।
तर, विकास बोर्डमा सधै राजनैतीक चलखेलबाट अध्यक्षको चयन गर्ने गरिन्छ । त्यो आरोप यसअघिका विभिन्न अध्यक्षहरुले खेप्दै आएका हुन् । यस पटक पनि कतै राजनैतिक चलखेल त हुने होइन् ? यो धेरैको मनमा उठेको प्रश्न हुन सक्छ ।
अध्यक्ष बन्ने दौडमा अहिले दयाराम दाहाल र भुवन केसीको नाम अगाडि आइरहेको छ ।
