पर्खाइमा, तिमीलाई देखेर, गाजलु टीका, उँभो–उँभो खासा, बादलपारिको देशबाट, हल्ला चलेछलगायत लोकप्रिय गीतका गायक राजु लामा आफ्नो सांगितक सफलतासँगै हँसिलो अनुहारका कारण पनि सबैको मनमा राज गर्न सफल छन् । राजुको बुझाईमा यो हाँसो गडगिफ्टेड नै हो ।
'म आफू र अरूलाई निराश बनाउँदिनँ । सकेसम्म हँसाउँछु । हिँड्दा गीत गुनगुनाउँछु । गायकका लागि रियाज पनि महत्वपूर्ण रहन्छ । निराशापन र नेगेटिभिटीबाट टाढा छु ,' राजु भन्छन् ।
उनी हाइकिङका साैखिन हुन् । समय मिलेसम्म हाइकिङ जान्छन् । त्यसैले ४२ वर्षको उमेरमा पनि फिट छन् । शिवपुरी डाँडा, नागार्जुन डाँडा, सुन्दरीजलपारि, चन्द्रागिरि, चित्लाङ, फुलचोकी, नगरकोट, साँखु, नमोबुद्धलगायत काठमाडौं नजिकका स्ठलमा हाइकिङ गर्दा एकान्त ठाउँ खोजेर घन्टौँ ध्यान गर्न पनि राजु पछि पर्दैनन् । स्टार हुनुका बाबजुद राजु सरल छन् ।
भागदौड गरेर मनमा अशान्ति मच्चाउनुको साटो शान्त जीवनयापन गर्न सहज लाग्ने उनी बताउँछन् ।
