काभ्रे तिमालडाँडास्थित तिमाल गाउँपालिका–३ स्थित कुडँवाल गाउँका बुद्धि तामाङ एसएलसी दिएर जागिर गर्न ०५६ सालमा काठमाडौें छिरेलगत्तै संघर्षका दिन सुरु भए । सोचेजस्तो जागिर नपाएपछि उनले इँटाभट्टामा मजदुरी गर्न थाले ।

आमा बिरामी भएकाले उपचारका लागि केही पैसा जुटाउन यसबाहेक अर्को विकल्प थिएन । मजदुरी गरेर पैसा कमाएपछि काठमाडौंमै आमाको उपचार गराए । घन्टौँ एउटै काम गर्नुपर्दा वेलावेलामा उनी आफैँसँग प्रश्न गर्थे, ‘बिहानै उठ्यो । इँटा घोप्ट्यायो । के यही हो जीवन ?’

त्यसपछि इँटाभट्टा छाडेर बदाम बेच्न थाले । अनि बरफ बेचे । त्यसपछि पत्रिका फाल्न थाले । यही क्रममा बिस्तारै पर्यटकको भारी बोकेर ठुल्ठूला पहाड चढ्न थाले । ट्रेकिङ पेसामै आबद्ध छँदा एक दिन साथी प्रभातलाई भेट्न उनको सामाखुशीस्थित ट्युसन सेन्टर पुगेका थिए । प्रभातले शंखरनारायण प्रजापतिलाई भेटाइदिए ।

उनलाई नाटकका लागि कलाकार चाहिएको थियो । बुद्धि तयार भए । ललितपुरको स्टाफ कलेजमा केही दिन अभिनयसम्बन्धी प्रशिक्षण लिएपछि उनले सडक नाटक थाले । 

स्थायी बासिन्दा बुद्धि सानैदेखि मिहिनेती थिए । त्यही मिहिनेत अभिनयमा पनि झल्कियो । सडक नाटकमा उनको पहिचान स्थापित हुँदै थियो । तर, यहीँबाट आर्थिक गुजारा टार्न सकिने अवस्था थिएन ।

त्यसैले सुरुवाती दिनमा उनले बाटो मोड्ने कोसिस पनि गरेका थिए । वैदेशिक रोजगारीमा दुबई जाने योजना बनाएका बुद्धिले फेरि एकपटक सोचे, ‘जीवनको ऊर्जाशील समय कतै न कतै खर्च त गर्नु नै छ । चाहे सफल भइयोस् वा असफल, म कलाकारिता नै गर्छु ।’

बसभाडा तिर्ने पैसा नहुँदा धेरैपटक बालुवाटारस्थित डबली थियटरबाट जावलाखेलसम्म हिँड्दै जाने र हिँड्दै आउने गरेको अनुभव उनीसँग छ । 
दर्जनौं सडक नाटकमा अभिनय गरेपछि बुद्धिले एक्टर्स स्टुडियोमा अनुप बरालसँग तीन महिनाको तालिम लिए । त्यसपछि गुरुकुल र नाचघरमा पनि नाटक गरे । 

प्रोसिनियम थियटरमा उनको डेब्यु नाटक ‘मलामी’ निकै मन पराइयो । यस नाटकमा बुद्धिले ६५ वर्षका वृद्धको भूमिका निभाएका छन् । ‘बुढा मान्छे कसरी हिँड्छन् भन्ने विषय बुझ्नका लागि म सबैभन्दा पहिले भक्तपुर पुगेँ । पाँचतले मन्दिरअगाडि बसेर ज्येष्ठ नागरिकहरूलाई दिनभर नियाल्थेँ ।

उनीहरूका बडी ल्याङ्ग्वेज र भावलाई ल्याउनु चुनौतीपूर्ण थियो,’ उनले भने, ‘एक दिन मैले आफ्नै हजुरबुबालाई सम्झिएँ । उहाँसँगका बाल्यकालका याद ताजा गरेँ र त्यसको प्रभाव नाटकमा उतारेँ ।’

उनको अभिनयको प्रशंसा धेरैले गरे । बिस्तारै दायाहाङ राई, राजन खतिवडा, सिर्जना सुब्बालगायत दिग्गज कलाकारसँग सम्पर्क भयो । यतिबेला रामबाबु गुरुङ कबड्डी फिल्मको तयारी गर्दै थिए । ‘ल तिमीहरू पनि खेल्नुपर्छ भनेर रामबाबु गुरुङले प्रस्ताव राख्दा हामीलाई चाहिँ आफैंले खेलेको फिल्म कसरी चल्छ होला र भन्ने लाग्थ्यो,’ बुद्धिले सम्झिए । 

तर, यही फिल्मले बुद्धिलाई रातारात स्टार बनायो । यस फिल्ममा बोलेको ‘हैट..’ थेगो आज उनको ब्रान्ड नै भइसकेको छ । कबड्डी, टलकजंग भर्सेज टुल्के र तान्द्रोमा अभिनय गरेपछि उनी ‘मेरी बास्सै’ टेलिसिरियलमा आबद्ध भए ।

यहाँ टेलिशृंखलाले उनको हैट थेगोलाई गाउँ गाउँसम्म पुर्‍यायो । यसपछि उनले असंख्य फिल्ममा अभिनय गरिसकेका छन् । उनी अभिनित धेरै फिल्म हिट छन् । अहिले बुद्धि तामाङ नेपालकै व्यस्त कलाकारको सुचीमा पर्छन् ।