‘टाढैबाट बोलाऊ भने छेक्छ डाँडैले 
डाँडै माथि आऊँ भने नि सेक्छ जाडैंले‍‍‍...’

युटुवमार्फत आइतबार सार्वजनिक यो गीत गायिका बसन्ता प्रकृतिको दोस्रो एल्बमको हो । प्रेम, रोमान्स र बैशालु उमेरका सन्दर्भ जोडेर बनाइएको यस गीतको भिडियो हरेक प्रेम जोडीले आफ्नै महसुस गर्छन् । गीतमा अनुराग शर्मा, ऋचा थापा र रमेश शाहीको अभिनय छ । कोरियोग्राफी तथा निर्देशन प्रदीप क्षेत्रको छ । 

गायिका बसन्ताको यो दोस्रो गीति एल्बमको पहिलो भिडियो हो । गीतमा गायिका बसन्तालाई चर्चित तथा लोकप्रिय सङ्गीतकार तथा गायक राजनराज सिवाकोटीले साथ दिएका छन् । सिवाकोटीकै सङ्गीत रहेको गीत डा. राजुबाबु श्रेष्ठले लेखेका हुन् । चारवटा गीत रहने पछिल्लो एल्बमको पहिलो गीत सार्वजनिक भए पनि अरू आउन बाँकी  छ ।

‘मनमा’ एल्बमबाट चर्चामा आएकी गायिका बसन्ता पछिल्लो समय गीत रेकर्डिङ तथा साङ्गीतिक कार्यक्रममा व्यस्त छिन् । सुमधुर स्वरकी धनी उनी  विशेष गरी युवापुस्तामाझ लोकप्रिय बन्दै गएकी छन् । गीत सङ्गीतलाई प्राणभन्दा प्यारो ठान्ने गायिका बसन्ता आफूले यस क्षेत्रमा धेरै सिक्न बाँकी रहेको बताउँछिन्  ।