चैत २८ गते रिलिज हुने चलचित्र 'प्रेम गीत ३'को पहिलो गीत सार्वजनिक भइसकेको छ । सार्वजनिक 'हात्ती ढुङ्गामा' बोलको गीतले युट्युब ट्रेण्डिङको नम्बर १ स्थान पनि हासिल गर्न सफल भएको थियो ।

अब भने सोही गीतमा टिकटक बनाउनेलाई चलचित्र निर्माण पक्षले स्कुटर उपहार दिने भएको छ । निर्माता सन्तोष सेनका अनुसार उक्त गीतमा टिकटक बनाउनेहरु मध्ये सर्वाधिक भ्युज र लाइक पाउनेलाई स्कुटर उपहार दिन लागिएको हो । उत्कृष्ट भिडियो बनाउने ३ जनालाई स्मार्ट फोन पनि दिइने सन्तोषले बताए । 

सन्तोषका अनुसार टिकटक भिडियो ओरजिनल भिडियोमा भएको जस्तै स्टेपमा बनाउनु पर्नेछ । बनाएको भिडियोलाई #Premgeet3 र #Chaitra28 लेखेर पोष्ट गर्नुपर्नेछ । भिडियो चैतको २७ गतेसम्म बनाउन सकिने सेनले बताए । 

सार्वजनिक उक्त गीतमा सागर आले र मेलिना राईले स्वर दिएका छन् । हर्क साउदको शब्द रहेको गीतमा कल्याण सिंहको संगीत रहेको छ । 
कविराज गहतराजको नृत्य निर्देशनमा बनेको भिडियोमा चलचित्रमा मुख्य कलाकार प्रदीप खड्का र कृष्टिना गुरुङ फिचर भएका छन् । भिडियोमा सुनिल थापा र माओत्से गुरुङलाई पनि देखाइएको छ ।

२ सय वर्ष पूरानो कथामा निर्माण भएको यस चलचित्रलाई निर्माता सेन र छेतेन गुरुङले संयुक्त रुपमा निर्देशन गरेका हुन् । चलचित्रमा शिव श्रेष्ठ, मनिष राउत, अनुभव रेग्मी, पुष्कर कर्की लगायतको मुख्य भूमिका रहेको छ । निकै मंहगो बजेटमा तयार भएको यस चलचित्रलाई प्रतिक्षित चलचित्रको रुपमा हेरिएको छ ।