प्रहरीलाई अभद्र व्यावहार गरेको आरोपमा गायिका आस्था राउतलाई प्रहरीको उजुरीमा जिल्ला प्रशासन कार्यलयले पक्राउ पूर्जी जारी गरेको थियो । सोमबार आस्था आफैँ प्रहरी समक्ष हाजिर भइन् । प्रहरीले आस्थामाथि थप अनुसन्धन गर्नुपर्ने भन्दै ४ दिन हिरासतमा राख्ने म्याद थप गर्यो ।
तर, बहिर भएको चर्को आलोचनापछि मंगलबार नै आस्थालाई रिहा गरिएको छ । ४ हजार धरौटी लिएर आस्थालाई प्रहरीले रिहा गरेको हो ।
रिहा भएपछि आस्थाले प्रहरीको खुलेर प्रशंसा गरेकी छिन् । उनले भनेकी छिन्, ‘प्रहरी मेरो साथी भन्ने कुरामा मलाई प्रश्न थियो । तर, साच्चिकै उहाँहरु साथी हुनुहुँदो रहेछ । मलाई साह्रो राम्रो र सहृदयपूर्ण वातावरण बनाइदिनु भएको छ । उहाँहरु प्रति मेरो सम्मान छ ।’
आस्थाले रिहाभएपछि पनि आफूले केही गल्ती गरेको स्विकारेकी छिन् । उनले भनिन्, ‘आवेगमा आएर मैले केही गलत शब्दहरु बोलेको छु । त्यसको लागि पुनः माफी माग्छु । कानुन भन्दा माथि कोही छैन् । त्यसैले कानुनी सजाय भोग्न म तयार छु ।’
आस्थालाई जिल्ला प्रशासन कार्यलयले फागुण १४ गते पुनः हाजिर हुन अनुरोध गरेको छ । आस्था आफू बोलाएको समयमा नै हाजिर हुने बताइन् ।
