दीपिका पादुकोण स्टारर चलचित्र ‘छपाक’लाई प्रतिक्षित चलचित्रको रुपमा हेरिएको थियो । चलचित्रको हाइप निकै उच्च थियो । चलचित्रले उठाएको विषयबस्तुको निकै चर्चा भएको थियो ।
अघिल्लो शुक्रबारबाट यस चलचित्र रिलिज भइसकेको छ । तर, चलचित्रले हलमा दर्शक भने पाएको छैन् । सँगै रिलिज भएको चलचित्र ‘तानाजी’ले हाउसफुल दर्शक पाइरहेको समयमा छपाक हेर्ने दर्शक भने न्युन छन् । धेरैले चलचित्र फ्लप भएको बताइरहेका छन् ।
तर, नायिका तथा निर्मात्री दीपिका पादुकोण यस चलचित्र फ्लप नभएको बताउँछिन् । सानो बजेटमा बनेको चलचित्र भएकाले चलचित्रले लगानी सुरक्षित गरेको उनले बताएकी छिन् । एक मिडियामा अभिब्यक्ति दिदैँ उनले भनेकी छिन्, ‘व्यापारिक हिसाबमा सोचेजस्तो नभए पनि हामीले धेरै माया पाएका छौँ । यो हाम्रो सफलता हो ।’
मेघन गुल्जारको निर्देशनमा बनेको यस चलचित्र वास्तविक घटनालाई प्रस्तुत गरेको छ । चलचित्रमा एसिड पिडित युवती लक्ष्मी अग्रवालको कथालाई प्रस्तुत गरेको छ । चलचित्रको विषयबस्तु दर्शकले रुचाएका छन् ।
