फागुन २३ गते रिलिज हुने चलचित्र ‘म यस्तो गीत गाउँछु २’ को दोस्रो गीत सार्वजनिक भएको छ । बिहिबार युट्युबमार्फत् चलचित्रमा समावेश ‘दुखको काँडा’ बोलको गीत सार्वजनिक गरिएको हो । सार्वजनिक उक्त गीतमा अर्जुन पोखरेलले संगीत भरेका छन् । देवल भण्डारीको शब्द रहेको गीतमा सनिश श्रेष्ठले स्वर दिएका छन् ।
गीतको भिडियोमा चलचित्रका मुख्य दुई कलाकार पल शाह र नायिका पूजा शर्मा फिचर छन् । भिडियोमा उनीहरुको प्रेमलाई देखाइएको छ । भर्खरै प्रेममा पर्दाको अवस्थालाई भिडियोमा समेटिएको छ । रामजी लामिछानेको करियोग्राफीमा तयार भएको भिडियोको मेकिङ पनि राम्रो छ ।
लभ स्टोरी जनरामा निर्माण भएको यस चलचित्रलाई सुदर्शन थापाले निर्देशन गरेका छन् । चलचित्रमा सुदर्शन र पूजा निर्माताको रुपमा रहेका छन् । चलचित्रमा जन्मजय र सम्पाङ राई सह-निर्माताको रुपमा रहेका छन् । चलचित्रलाई सौरभ लामाले खिचेका छन् ।
यस अघि चलचित्रमा समावेश ‘तिम्रो घरको वरीपरी’ बोलको गीत सार्वजनिक गरिएको थियो । उक्त गीतले सार्वजनिक भएको केही समयमा नै ५० लाख भ्युज पाएको छ । उक्त गीतले पनि उत्कृष्ट प्रतिकृया पाइरहेको छ ।
