नेपाली क्रिकेटमा पुर्याएको योगदानको कदर गर्दै पूर्व कप्तान पारस खड्काले लगाउने ७७ नम्बरको जर्सीलाई नेपाल क्रिकेट संघ क्यानले अर्को खेलाडीमा प्रयोग नगर्ने भएको छ ।
अन्तर्राष्ट्रिय खेलाडी जीवनबाट सन्यास लिएका पारसले पुर्याएको योगदानको कदर गर्दै क्यानले उनले लगाउँदै आएको ७७ नम्बरको जर्सीलाई रिटायर्ड गर्ने भएको हो ।
पारसले मंगलबार बिहान आश्चर्यजनक रूपमा खेलाडी जीवनलाई विश्राम दिने निर्णय गरेका थिए । १८ वर्षको करियरमा उनी नेपालका लागि सबैभन्दा सफल कप्तान रहेका थिए ।
सन् २००२ मा उमेर समूहबाट क्रिकेट करियर सुरु गरेका पारसले सन् २००४ मा सिनियर टिममा अन्तर महादेशीय क्रिकेट प्रतियोगितामा मलेसियाविरुद्धको खेलमा डेब्यु गरेका थिए ।
सन् २००९ मा विनोद दासको स्थानमा पारसले नेपाली टिमको कप्तानी सम्हालेका थिए । त्यसपछि १० वर्ष नेपाली टिमको कप्तानी गरेका पारसले दुई वर्षअघि कप्तानी छोडेका थिए ।
उनको कप्तानी समयमा नेपाली क्रिकेटले अभूतपूर्व सफलता हासिल गरेको थियो । सन् २०१५ मा नेपाल क्रिकेट संघलाई अन्तर्राष्ट्रिय क्रिकेट परिषद् आइसिसीले निलम्बन गर्दा उनी नेपाली क्रिकेट टोलीसँगै अन्तर्राष्ट्रिय समन्वयको जिम्मेवारीमा समेत थिए ।
आफूले जीवनमा देखेको मुख्य सपना नेपाली क्रिकेटको उन्नति भएको र यसका लागि सम्पूर्ण क्रिकेट समाज र सरोकारवालाहरूको संयुक्त प्रयासको आवश्यकता पर्ने भन्दै उनले इमानदारीताका साथ काम गर्ने हो भने नेपाली क्रिकेट धेरै माथि पुग्ने उल्लेख गरेका छन् ।
‘क्रिकेटरको रूपमा मैले आफ्नो मन,वचन र कर्मले कर्तव्यनिष्ठ भई देश र नेपाली क्रिकेट जगतको उत्थानका लागि सदैव आफ्नो भूमिका निर्वाह गरेँ,अन्तर्राष्ट्रिय क्रिकेटरका रूपमा मेरो यात्रा टुङ्गिएको छ तर नेपाली क्रिकेटका लागि मेरो सपना भने अझै बामे सर्दै छन्, मैदान भित्रका यी दुई दशक, जीवन रहुन्जेल, मिठो यादका रूपमा मसँग रहनेछन् । हामी सबैले मिलेर नेपाली क्रिकेटलाई नयाँ उचाइमा पुर्याउने छौँ भन्ने विश्वास लिएको छु’ पूर्व कप्तान पारसले फेसबुकमा लेखेका छन् ।
पारस खड्का नेपाली क्रिकेटको एक बलियो पिल्लरका रूपमा रहेका थिए । उनी नेपालका लागि एकदिवसीय तथा टी- २० दुवै फर्म्याटमा शतक प्रहार गर्ने पहिलो क्रिकेटरका रूपमा रहेका छन् ।
युएई र सिंगापुरविरुद्ध पारस खड्काले २०१९ मा शतक बनाएका थिए भने सन् २००८ देखि कप्तानको भूमिकामा रहेका पारसले सोही वर्ष नेपाली क्रिकेटको कप्तानको जिम्मेवारी छाड्दै ज्ञानेन्द्र मल्ललाई जिम्मेवारी सुम्पिएका थिए ।
अलराउण्डर पारस खड्का नेपाली क्रिकेटको सर्वाधिक सफल कप्तान हुन् ।
उनको कप्तानीमा नेपालले क्रिकेट इतिहासमै पहिलोपटक २०१४ को टी -२० विश्वकप खेल्ने सुनौलो मौका पाएको थियो । नेपालले उनको कप्तानीमा २०१८ मा पहिलोपटक एकदिवसीय मान्यतासमेत पाएको थियो ।
नेपाली भूमिमा गत फागुनमा सम्पन्न नेदरल्याण्ड्स, मलेसिया र नेपाल सम्मिलित त्रिदेशीय प्रतियोगिता नखेलेका पारसले घरेलु क्रिकेटमा भने आफ्नो भरपुर साथ र सहयोग रहने उल्लेख गरेका छन् ।
नेपाली क्रिकेटमा दुई दशकदेखि अभिभावकको रूपमा रहेका पारसको नेपाली क्रिकेटप्रतिको योगदान र लगाव सम्मानयोग्य रहेको छ ।
