महिला, बालबालिका तथा ज्येष्ठ नागरिक मन्त्रालयले मानव बेचबिखन तथा नियन्त्रणको क्षेत्रमा विशेष योगदान दिएको भन्दै वरिष्ठ पत्रकार कुमार यात्रुसहित दुई जना पत्रकार, दुई सञ्चार संस्था र दुई जना अभियानकर्ता गरी आठ जनालाई पुरस्कृत एवं सम्मान गरेको छ ।
महिला, बालबालिका तथा ज्येष्ठ नागरिक मन्त्रालयमा बुधबार आयोजित संक्षिप्त कार्यक्रममा पत्रकार यात्रुलगायतलाई नगद पुरस्कार २० हजार रुपैयाँसहित सम्मानपत्र प्रदान गरेको हो ।
पुरस्कृत हुनेमा टेलिभिजनतर्फ इन्डिजिनियस टेलिभिजनका प्रमुख कार्यकारी कार्यक्रम निर्माता कुमार यात्रु छन् । त्यसैगरी छापातर्फ दैलेखकी पत्रकार ज्योति कटुवाल, संस्थातर्फ शक्ति समूहकी माया तामाङ र प्रहरी प्रधान कार्यालय मानव बेचबिखन अनुसन्धान ब्युरोका प्रहरी निरीक्षक श्रीराम थापालाई पुरस्कार एवं सम्मानित गरिएको हो ।
यसरी नै संस्थागततर्फ वैदेशिक रोजगारबाट फर्केर आएका महिलाको संस्था पौरखी नेपाल, जिल्ला प्रहरी कार्यालय कैलाली, हिमालय टाइम्स राष्ट्रिय दैनिक र हाम्रा कुरा अनलाइनलाई पनि सम्मानित गरिएको थियो ।
महिला मन्त्रालयकी सचिव यामकुमारी खतिवडाको अध्यक्षतामा भएको कार्यक्रममा राष्ट्रिय योजना आयोगकी सदस्य सलोनी प्रधान सिंहले पुरस्कार प्रदान गरेकी थिइन् ।
कार्यक्रममा योजना आयोगकी सदस्य सिंहले मानव बेचबिखनविरुद्धको अभियान सफल बनाएर नेपाललाई बेचबिखनमुक्त देश बनाउनुपर्ने धारणा राखिन् । नेपाल प्रहरी मानव बेचबिखन अनुसन्धान ब्युरोकी प्रमुख एसएसपी दुर्गा सिंहले अपेक्षा वैदेशिक रोजगारका नाममा हुने मानव बेचबिखन रोक्न सबै पक्षको साथ र सहयोगको अपेक्षा गरिन् ।
शक्ति समूहकी माया तामाङले पुरस्कारबाट जीवनको दोस्रो खुसी पाएको बताइन् ।
सोही समारोहमा गत वर्षका ७ व्यक्ति र संस्थालाई पनि पुरस्कार प्रदान गरिएको थियो ।
मानव बेचबिखन तथा ओसारपसारविरुद्धको १५औँ राष्ट्रिय दिवसका अवसरमा विभिन्न व्यक्ति तथा संस्थालाई पुरस्कार तथा सम्मान गर्ने घोषणा भएअनुसार बुधबार सम्मान हस्तान्तरण भएको हो ।
