सङ्खुवासभाको मादी नगरपालिका–१ स्थित उम्लिङमा भएको सामूहिक हत्यास्थलमा तालिम प्राप्त कुकुर परिचालन गरेर अनुसन्धान सुरु गरिएको छ । प्रहरीले घटनास्थलमा ‘डग स्निफिङ’ गराएको मादी नगरपालिकामा मेयर विदुर कुमार लिंथेपले बताए ।
सोमबार दिउँसो मादी नगरपालिका–१ घर भएका तेजबहादुर कार्की, आमा पार्वती, श्रीमती कमला, बुहारी ३२ वर्षीया रञ्जना कार्की, ८ वर्षीय विपिन कार्की र पाँच वर्षीया गोमा कार्कीको शव फेला परेको थियो ।
सङ्घीय प्रहरी इकाई कार्यालय धरानबाट प्रहरी उपरीक्षक ‘एसपी’ भीम दाहाल नेतृत्वको टोलीले सोमबार साँझ घटनास्थलमा पुगेर तालिमप्राप्त कुकुर परिचालन गरि अनुसन्धान सुरु गरेका हुन् ।
‘शव फेला परेको ठाउँमा कुकुरलाई सुँघाउने काम हुँदै छ’ घटनास्थलमा रहेका मेयर लिंथेपले भने–‘अहिलेसम्म हत्याको कारण थाहा भएको छैन, अनुसन्धानमा प्रहरीलाई सहयोग गरिरहेका छौँ ।’
शव घरबाहिर चार ठाउँमा फेला परेको छ । ८ वर्षीय बालकको शव घरभन्दा १ किलोमिटर पर बारीमा फेला परेको छ । रञ्जन कार्कीको शव खोलामा र ५२ वर्षीय तेजबहादुरको शव सडकमा फेला परेको प्रदेश–१ प्रहरी कार्यालयका प्रवक्ता (एसपी) नवीराज राईले बताए ।
परिवारका एक जना सदस्य जीवित फेला परेका छन् । बौद्धमान कार्की सकुशल फेला परेका हुन् । उनी बोल्न सक्ने अवस्थामा छैनन् । सङ्खुवासभाका डिएसपी लालध्वज सुवेदी सोमबार दिउँसो घटनास्थलमा पुगेका थिए ।
