काठमाडौं । बैंकिङ कसुर (चेक बाउन्स) सम्बन्धी मुद्दाका एक फरार प्रतिवादीलाई प्रहरीले पक्राउ गरेको छ ।
काठमाडौं महानगरपालिका-१६ बस्ने ४८ वर्षकी प्रेम कुमारी खड्गीलाई प्रहरीको केन्द्रीय अनुसन्धान ब्यूरो (सिआइबी) को टोलीले पक्राउ गरेको हो ।
खड्गीले आफ्नो खातामा पर्याप्त मौज्दात रकम नभएको भन्ने जानी-जानी जाहेर वालालाई झुक्यानमा पारी एनएमबी बैंकको चेक दिई बैंकिङ कसुरजन्य अपराध गरेको प्रहरीले जनाएको छ ।
उनलाई उच्च अदालत पाटनबाट गत २०७६ जेठ २१ गते बैंकिङ कसुर तथा सजाय ऐन २०६४ बमोजिम पाँच दिन कैद र २० लाख जरिवाना ठहर भएको थियो ।
प्रहरीको केन्द्रीय अनुसन्धान ब्यूरो (सिआइबी) बाट फैसला कार्यान्वयन तथा फरार प्रतिवादीहरुको खोजतलास एवं पक्राउको लागि परिचालित टोलीले उनलाई सोहृखुट्टेबाट पक्राउ गरेको हो ।
फैसला कार्यान्वयनको लागि खड्गीलाई ललितपुर जिल्ला अदालतमा पेश गरिएको प्रहरीले जनाएको छ ।