काठमाडौ । सरकारले इजरायलका लागि खुला गरेको आवेदन अन्तर्गत १२ दिनमा करिब चार गुणाभन्दा बढी आवेदन परेको छ ।
एक हजार श्रमिकका लागि साउन १२ गते आवेदन खुला गरिएको थियो । आवेदन २१ दिनमा सकिने जनाइएको छ ।
वैदेशिक रोजगार विभाग इजरायल शाखा प्रमुख डम्बर सुनुवारका अनुसार इजरायल रोजगारीका लागि १९ हजार ९५ जनाले युजर आइडी बनाएका छन् ।
जसमध्ये कागजपत्र पुर्याउने अहिलेसम्म ३ हजार ८०० जना रहेका छन् । आवेदन दिनेमा १ हजार ६५१ जना महिला र २ हजार १६१ जना रहेको सुनुवारले जानकारी दिए ।
नेपाली श्रमिकका लागि इजरायलमा रोजगारी झण्डै ११ वर्षपछि खुलेको हो । आकर्षक सेवा सुविधा र मर्यादित कार्यस्थल मानिएको इजरायलमा श्रमिकमाथि अत्यधिक आर्थिक भार परेको भन्दै सन् २००९ देखि जान रोक लगाइएको थियो ।
रोजगारीमा जान चाहनेले विभागको बेवसाइटमा गएर अनलाइन फाराम भर्न सक्नेछन् । सरकारी संयन्त्रमार्फत कामदार पठाउन भएको सम्झौताअनुसार आवेदन खुल्ला गरिएको हो ।
शाखा प्रमुख सुनुवारका अनुसार रोजगारीका लागि इजरायल जानेको मासिक नेपाली रुपैयाँ करिब १ लाख ९३ हजार तलब हुन्छ । कामदारको खानाको प्रबन्ध आफैं मिलाउनुपर्ने छ भने बस्ने व्यवस्था रोजगारदाताले नै मिलाउने छ ।
इजरायलमा ३० प्रतिशत अर्थात् ३०० जना पुरुष र ७० प्रतिशत अर्थात् ७०० जना महिला गरी एक हजार जनाले रोजगारी पाउने प्रमुख सुनुवारले जानकारी दिए ।
सम्झौतासँगै केयर गिभर क्षेत्र, कृषि क्षेत्र, होटल/रेष्टुरेण्ट, निर्माण लगायतका क्षेत्रमा इजरायलले नेपालीलाई रोजगारीको अवसर दिलाउनेछ ।
