काठमाडौं । निर्मला पन्तको बलात्कार तथा हत्या भएको आज (साउन १० गते) तीन वर्ष पूरा भइसकेको छ, घटनामा संलग्न दोषी अझै पत्ता लाग्न सकेको छैन ।
यसै सन्दर्भमा नेपाली कांग्रेसका प्रवक्ता विश्वप्रकाश शर्माले यअघि प्रतिपक्ष रहेको आफ्नो पार्टीको नेतृत्वमा भर्खरै गठित सरकारलाई निर्मलाको न्यायमा ध्यान दिन आग्रह गरेका छन् ।
‘बालिका निर्मला पन्तको प्रकरण आज साउन १० गते तीन वर्ष पुग्यो । सम्माननीय प्रधानमन्त्री र माननीय गृहमन्त्रीको ध्यानाकर्षण गराउन चाहन्छु,’ आइतबार शर्माले सामाजिक सञ्जालमा लेखेका छन्, ‘प्रतिपक्षमा छँदा प्रश्न थिए हामीसँग । हामीसँग सत्तारूढ बनेपछिको समयले जवाफ माग्छ ।’
बालिका निर्मला पन्तको प्रकरण आज साउन १० गते ३ बर्ष पुग्यो l सम्माननिय @PM_nepal_ र माननीय गृहमन्त्रीको ध्यानाकर्षण गराउन चाहन्छु l
— Bishwa Prakash शर्मा (@bishwaprakash77) July 25, 2021
प्रतिपक्षमा छंदा प्रश्न थिए हामीसंग l सत्तारूढ बनेपछिको समयले जवाफ माग्छ l सरकार भर्खर बनेको छ, अब गहन दायित्व निभाउन बिशेष गम्भीरता अपेक्षित छ l pic.twitter.com/fgEW6IExgd
सर्वोच्च अदालतको फैसलापछि कांग्रेसका सभापति शेरबहादुर देउवाको नेतृत्वमा गठबन्धनको सरकार बनेको छ र गृहमन्त्री पनि कांग्रेस नेता बालकृष्ण खाँण छन् ।
हालै गठित सरकारले अब गहन दायित्व निर्वाह गर्न गम्भीर बन्ने अपेक्षा गरिएको कांग्रेस प्रवक्ता शर्माले उल्लेख गरेका छन् ।
‘बालिका र महिलाउपर हिंसा, बलात्कार र हत्याको अनेक घटना देशले जो बेहोर्दै आयो, त्यो नियन्त्रण गर्न राज्यको कठोरतासँगै राजनीतिक द्वन्द्व भन्दामाथि सामाजिक रूपान्तरणको साझा अठोट र अभियान जरुरी छ,’ प्रवक्ता शर्माले भनेका छन्, ‘निर्मलालाई न्यायसँगै, कसैले पनि यस्तो नियति भोग्न नपरोस्, विशेष तदारुकता बढाऔं ।’
बालिका र महिला उपर हिंसा, बलात्कार र हत्याको अनेक घटना देशले जो व्यहोर्दै आयो, त्यो नियन्त्रण गर्न राज्यको कठोरतासँगै राजनैतिक द्वन्द्व भन्दामाथि सामाजिक रुपान्तरणको साझा अठोट र अभियान जरुरी छ l
— Bishwa Prakash शर्मा (@bishwaprakash77) July 25, 2021
निर्मलालाई न्यायसँगै, कसैले पनि यस्तो नियति भोग्न नपरोस्, बिशेष तदारुकता बढाऔं !
२०७५ साल साउन १० गते कञ्चनपुरको भीमदत्त नगरपालिका–२ की १३ वर्षीया निर्मला पन्त होमवर्क गर्न भन्दै साथीको घरमा गएकी थिइन् । भोलिपल्ट स्थानीय उखुबारीमा उनी मृत भेटिएकी थिइन् । बलात्कारपछि हत्या गरिएको अवस्थामा उनको शव फेला परेको थियो ।
