काठमाडौं उपत्यकासहित विभिन्न जिल्लामा निषेधाज्ञा खुकुलो पारिए पनि पहिलाको भन्दा कोभिड–१९ को संक्रामक भेरियन्ट देखिएको र जोखिम नघटेका विज्ञहरुले बताएका छन् । कोरोनाभाइरसको नयाँ भेरियन्टका कारण पनि जोखिम कम भइनसकेको जानकारहरू बताउँछन् .
जसकारण जनस्वास्थ्यका मापदण्ड पूर्ण रूपमा पालना गर्नुपर्न उनीहरुले सुझाव दिएका छन् । कोरोनाभाइरस (कोभिड–१९) रोकथाम र नियन्त्रणका लागि जारी निषेधाज्ञा काठमाडौं उपत्यकाका तीन वटै जिल्लामा मंगलबारदेखि खुकुलो भएपनि जोखिम उच्च रहेको बताइन्छ ।
गएको पुस, माघ, फागुनमा भारतमा संक्रमणको दोस्रो लहर बढ्दै जाँदा नेपालको अवस्था लगभग कोरोना मत्थर भइसकेको जस्तो देखिन्थ्यो । स्वास्थ्यकर्मीहरूले सतर्कता अपनाउन त्यतिवेला दिएको सुझावलाई कसैले पनि गम्भीर रूपमा लिएको देखिएन । राजनीतिक दलहरूले सभा, भेला जस्ता कार्यक्रमलाई निरन्तरता दिइएकोले नेपालमा थप जोखिम बढ्दै दोस्रो भेरियन्ट देखा परेको विज्ञहरु बताउँछन् ।
अव नागरिकको दायित्व
कोभिड–१९ को जोखिम घटेर भन्दा पनि जनजीवन असहज भएकाले निषेधाज्ञा खुकुलो बनाउनुपरेको सरकारी अधिकारीहरु बताउँछन् । ललितपुरका प्रमुख जिल्ला अधिकारी ढुण्डीप्रसाद निरौला निषेधाज्ञाले सर्वसाधारणको दैनिकीमा परेको प्रभाव मूल्यांकन गरेर क्रमशः खुकुलो गर्दै जान लागेको बताउँछन ।
सरकारले निषेधाज्ञा खुकुलो बनाउँदै लगेकाले जनस्वास्थ्यका मापदण्ड पालना गर्ने कुरामा आमनागरिकको जिम्मेवारी थपिएको डा. अनुप बास्तोला बताउँछन् । उनी भन्छन्, ‘तपाईंहरू डेढ वर्षसम्म जोगिएर बस्नुभयो भने अब संक्रमित हुने जोखिम किन मोल्नुहुन्छ ?’
५४ हजार सक्रिय संक्रमित
स्वास्थ्य तथा जनसंख्या मन्त्रालयका अनुसार, ७ असारमा कोभिड–१९ बाट देशभर ४६ जनाको ज्यान गयो । जब कि काठमाडौं उपत्यकासहित विभिन्न जिल्लामा निषेधाज्ञा शुरू हुनु अघिल्लो दिन १५ वैशाखमा १० जनाको मृत्यु भएको थियो । यस्तै, १५ वैशाखमा ३० हजार सक्रिय संक्रमित थिए । ७ असारमा त्यो संख्या बढेर ५४ हजार पुगेको छ ।
कोरोनाभाइरसको नयाँ भेरियन्टका कारण पनि जोखिम कम भइनसकेको जानकारहरू बताउँछन् । हालै सबै उमेरका व्यक्तिलाई बढी संक्रामक हुने नयाँ भेरियन्टको पहिचान भएको छ । काठमाडौं टेकुस्थित राष्ट्रिय जनस्वास्थ्य प्रयोगशालामा छनोट गरी पठाएको ४८ नमुनाको जिनोमिक पहिचान गर्दा ४७ वटामा डेल्टा भेरियन्ट पुष्टि भएको स्वास्थ्य मन्त्रालयका सह–प्रवक्ता डा. समीरकुमार अधिकारीले बताए । उनका अनुसार, ती नमुनामध्ये ९ वटामा उत्परिवर्तन भेटिएको छ ।
