काठमाडौैं । बाढीपहिरोले विभिन्न जिल्लाका १५ ठाउँमा राजमार्ग पूर्णरूपमा बन्द भएको छ ।
सबैभन्दा धेरै मनाङ र लमजुङ जिल्लाका सडक बन्द छन् । डुम्रे बेसीसहर–चामे सडक खण्डमा पर्ने मनाङ र लमजुङको ७ ठाउँका सडक बन्द छ । डुम्रे बेसीसहर–चामे सडक खण्डको मनाङमा पर्ने तिमाङ छहरा, तिमाङखोला, धारापानी र बगरछाप तथा लमजुङमा पर्ने रामबजार, अर्खले, च्याम्चे र घट्टेखोला सडक बन्द छन् ।
यस्तै, बाजुराको साँफेबगर–मार्तडी–कोल्टी सडक खण्डको बार्जुगाड र हड्डे खोलामा सडक अवरूद्ध भएको छ । मुगुको घच्चीलेक, कालीकोटको भिग्म सडक, सुर्खेतको भेरी करिडोर सडकमा पनि पहिरोले पूर्णरूपमा बन्द भएको छ ।
अरनीको राजमार्ग अन्तर्गत सिन्धुपाल्चोकको लिपिङ पुल र कोदारी, रसुवाको ठोरी-भण्डारा-मलेखु-गल्छी-त्रिशूली-वेत्रावती-मैलुङ-स्याफ्रुवेसी-रसुवागढी सडकखण्डको त्रिशूली खोला, सानु भार्खु खोला तथा गाँजाबारीमा पनि पहिरोले सडक पूर्णरूपमा बन्द भएको छ ।
सडक खुलाउने प्रयास भइरहे पनि पहिरो पहिरो पन्छाउन समस्या भएको सडक विभागले जनाएको छ । विभागकाअनुसार बाढी पहिरोका कारण ५२ ठाउँमा सडक बन्द रहेकोमा ११ ठाउँमा दुईतर्फी र २६ ठाउँमा एकतर्फी खुलाइएको छ ।
