माध्यामिक शिक्षा एसईई परीक्षा कसरी सञ्चालन गर्ने भन्ने विषयमा राष्ट्रिय परीक्षा बोर्डले आन्तरिक छलफल थालेको छ । सामाजिक दूरी कायम गरेर वा अनलाइनबाट भए पनि एसईई परीक्षा लिने निष्कर्षमा बोर्ड पुगेको छ ।
गएको वर्ष परीक्षा नलिएरै आन्तरिक मूल्यांकनबाट नतिजा निकालिएको थियो । त्यसो हुँदा परीक्षाफल विश्वसनीय नभएपछि त्यसको चर्को आलोचना भएको थियो । यसपटक भने बोर्डले विद्यालयलाई जिम्मा दिएर परीक्षा सञ्चालन गर्ने निष्कर्ष निकालिएको एक उच्च अधिकारीले बताए ।
कोभिड १९ महामारीका कारण भौतिक उपस्थितिमा बोर्डले तयार पारेका प्रश्नपत्र र कापी बाँडेर परीक्षा गर्ने सम्भावना कम हुँदै गएको छ । विद्यालयबाटै परीक्षा सञ्चालन गरेर मात्रै नतिजा निकाल्ने तयारी अघि बढेको हो ।
ती अधिकारीले नेपाल फ्ल्याससँग भने ‘सम्बन्धित विद्यालयलाई जिम्मा दिएर परीक्षा सञ्चालन गर्ने निष्कर्ष छ, यस विषयमा शिक्षा मन्त्रालयमा प्रस्ताव पठाइएको छ । यताबाट निर्णय आउन बाँकी छ ।’
बोर्डका अध्यक्ष चन्द्रमणि पौडेलले पनि मन्त्रालयबाट अनुमति पाएमा अर्को हप्तादेखि नै परीक्षा सञ्चालनको तयारी अघि बढ्ने बताए ।
सरकारले बढ्दो कोभिड १९ महामारीलाई नियन्त्रण गर्न जेठ १३ गतेदेखि सञ्चालन हुने एसईई परीक्षा बैशाख २७ गते नै स्थगित गर्ने निर्णय गरेको थियो । कोभिडका कारण कक्षा १२ को परीक्षा पनि रोकिएको छ ।
तत्काल वैकल्पिक माध्ययमबाट एसईई परीक्षा अगाडि बढाएर त्यसपछि महामारीको अवस्था अनुसार कक्षा १२ को परीक्षा सञ्चालन गरिने अध्यक्ष पौडेलले बताए ।
