अख्तियार दुरुपयोग अनुसन्धान आयोगले भूमिसुधार तथा मालपोत कार्यालय लगनखेलका नायब सुब्बासहित दुई जनालाई घुस लिँदालिँदै पक्राउ गरेको छ ।
आयोगका सहायक प्रवक्ता गणेशबहादुर अधिकारीले नासु मन्दिपकुमार श्रेष्ठ र लेखापढी व्यवसायसमेतको काम गर्ने रमेशलाल श्रेष्ठलाई जग्गा हालसाबिकको क्रममा ट्रायल चेक गर्दा नक्साअनुसार क्षेत्रफल बढी भएको भन्दै मिलाइदिन घुस लिएको जानकारी दिए ।
उनका अनुसार टंगालबाट खटिएको अख्तियारको टोलीले श्रेष्ठद्वयलाई सेवाग्राहीबाट ४० हजार अतिरिक्त रकम लिइसकेको अवस्थामा ललितपुर महानगरपालिका १२ लगनखेलस्थित बसपार्कबाट मंगलबार नियन्त्रणमा लिइएको हो ।
यसबारे थप अनुसन्धान भइरहेको अख्तियारले जनाएको छ ।
