काठमाडौं । महानगरीय ट्राफिक प्रहरी महाशाखाले १८ प्रहरीलाई पुरस्कृत गरेको छ ।
ट्राफिक नियम उल्लङ्घनका क्रममा आर्थिक प्रलोभनमा नपरी घूस फिर्ता गर्ने १८ ट्राफिक प्रहरीलाई महाशाखाले पुरस्कृत गरेको हो ।
महाशाखाका अनुसार ट्राफिक नियम उल्लङ्घन गर्ने सवारी चालकलाई नियमानुसार कारबाही गर्ने क्रममा घूस दिई प्रलोभनमा पार्न खोज्ने चालकलाई पक्राउ गरी कारबाहीको दायरामा ल्याउनेहरुलाई पुरस्कृत गरिएको हो ।
पछिल्लो समय ट्राफिक कारबाहीका क्रममा ट्राफिक प्रहरीलाई घूस दिन खोज्ने ६९ सवारी चालकलाई पक्राउ गरी कारबाहीको दायरामा ल्याउने उनीहरुसहित ५३ ट्राफिक प्रहरीलाई पुरस्कृत एवं सम्मान भइसकेका छन् ।
महानगरीय ट्राफिक प्रहरी महाशाखाले ट्राफिक प्रहरीको अनुपस्थितिमा हुने ट्राफिक नियम उल्लङ्घन गर्ने सवारीसाधनलाई निगरानी गर्न आइतबारदेखि ‘ट्राफिक सर्भिलेन्स भेइकल’ सञ्चालन गरेको छ । उपत्यकाको व्यस्त सडकमा हुने सवारी चापलाई व्यवस्थापन गर्न र फराकिला सडकमा हुने तीव्र गतिलाई नियन्त्रण गर्न ‘ट्राफिक सर्भिलेन्स भेइकल’ प्रभावकारी हुने महाशाखाले जनाएको छ ।
