काठमाडौं । नगर प्रहरीमा जागिर लगाइने प्रलोभन देखाएर पैसा असुल्ने एक व्यक्ति पक्राउ परेका छन् ।
पक्राउ पर्नेमा काठमाडौं बूढानीलकण्ठ नगरपालिका वडा नं ७ गल्फुटार बस्ने ३८ वर्षीय हरि थापा मगर रहेका छन् ।
नगर प्रहरीमा जागिर लगाइदिन्छु भन्दै उनले ६ जनासँग पैसा असुलेको महानगरीय प्रहरी प्रभाग बुढानिलकण्ठले जनाएको छ ।
थापा मगरले नगर प्रहरी जवानमा जागिर लगाइदिन्छु भन्दै ६ जनासँग ६७ हजार ७५० रुपैयाँ लिएको अनुसन्धानबाट खुलेको बुढानिलकण्ठ प्रभागका प्रहरी निरीक्षक (इन्सपेक्टर) राजकुमार तामाङले जानकारी दिए ।
तामाङका अनुसार फर्जी प्रवेश पत्र समेत बनाएर ठगी गरेको अवस्थामा थापामगर पक्राउ परेका हुन् ।
बुढानिलकण्ठ प्रभागले उनलाई थप अनुसन्धान तथा कारवाहीको लागि महानगरीय प्रहरी वृत्त महाराजगञ्ज पठाएको छ ।
