धनुषा । जनकपुरमा २६ वर्षीया आरती साहमाथि एसिड आक्रमण गर्ने व्यक्ति उनकै श्रीमान् भएको पुष्टि भएको छ ।
आरतीमाथि एसिड आक्रमण गरेको आरोपमा प्रहरीले आरतीका पति जनकपुरधाम उपमहानगरपालिका २०, देवपुरारुपैठा बस्ने २७ वर्षीय सञ्जीव साहलाई पक्राउ गरेको छ ।
आरतीमाथि एसिड आक्रमण भएको केही घण्टामै उनलाई प्रहरीले पक्राउ गरेको हो ।
आरती र सञ्जीवको तीन वर्षअघि विवाह भएको थियो ।
श्रीमानसँग राम्रो सम्बन्ध नभएपछि उनी माइतमा बसेर जनकपुरकै पेठिया बजारमा तरकारी व्यवसाय गर्दै आएकी थिइन् ।
पक्राउ परेका सञ्जीवलाई आजै सार्वजनिक गर्ने धनुषाका प्रहरी उपरीक्षक रामेश बस्नेतले जानकारी दिए ।
आज (शनिबार) बिहान जनकपुरधाम उपमहानगरपालिका ७ जानकी नगरका सुवोध साहकी छोरी आरतीमाथि एसिड आक्रमण भएको थियो ।
एसिड प्रहारबाट आरतीको निधार र छातीको केही भाग जलेको छ । उनको जानकी हेल्थकेयरमा उपचार भइरहेको छ ।
