काठमाडौं । त्रिभुवन विश्वविद्यालयको समाजशास्त्र केन्द्रीय विभागका उपप्राध्यापकलाई कुटपिट गरेको आरोपमा दुई जनालाई प्रहरीले पक्राउ गरेको छ ।
पक्राउ पर्नेमा सिरहा घर भई हाल काठमाडौं महानगरपालिका ३२ कोटेश्वर बस्ने २३ वर्षीय रुपेश साह र सिरहाकै २४ वर्षीय रविनकुमार लामा रहेका छन् ।
महानगरीय प्रहरी परिसरबाट खटिएको प्रहरीको विशेष टोलीले उनीहरुलाई पक्राउ गरेको हो ।
साहलाई काठमाडौंबाट र लामालाई सिरहाबाट पक्राउ गरिएको महानगरीय प्रहरी परिसर काठमाडौंका प्रवक्ता प्रहरी उपरीक्षक सोमेन्द्रसिंह राठौरले जानकारी दिए ।
असोज २० गते बिहान साढे ९ बजेको समयमा त्रिभुवन विश्वविध्यालयको परिसरमा उपप्राध्यापक प्रेम चलाउनेलाई कुटपिट गरिएको थियो ।
चलाउनेलाई रड प्रहार गरेर आक्रमण गरिएको थियो ।
