काठमाडौं । शनिबार राति सिन्धुपाल्चोक जिल्लामा गएको भीषण पहिरोमा परि बेपत्ता हुने तीन जनाको शव भेटिएको छ । साथै अझै २८ जना बेपत्ता छन् । उनिहरुको उद्धार र खोजी कार्य भइरहेको प्रहरीले जनाएको छ ।
उक्त जिल्लाको बाह्रबिसे नगरपालिका– ७ का तीन स्थानमा पहिरो जाँदा बेपत्ता भएकामध्ये तीन जनाको शव भेटिनुका साथै २८ जना बेपत्ता भएको जिल्ला प्रहरी कार्यालय सिन्धुपाल्चोकका डिएसपी प्रकाश सापकोटाले जानकारी दिए ।
पहिरोमा खोजी गर्दा नागपुजेकी ६५ वर्षीया भक्तिमाया श्रेष्ठ, भिरखर्कको विक टोलकी २३ वर्षीया जुनुमाया विक र नेवार टोलकी ६० वर्षीया सर्किनी नेवारको शव भेटिएको उनको भनाइ छ । घटनास्थलमा नेपाली सेना, सशस्त्र प्रहरी र नेपाल प्रहरीको टोली उद्धारमा खटिएका छन् ।
