धनुषा । जिल्ला प्रशासन कार्यालय धनुषाले पुन : एक साताका लागि निषेधज्ञा थप गरेको छ । कोभिड–१९ को संक्रमण बढ्दै गएपछि आइतबार मध्यराति १२ बजेदेखि लागू हुने गरी भदौ १४ गतेसम्मका लागि निषेधाज्ञा थप गरिएको हो ।
प्रमुख जिल्ला अधिकारी प्रेमप्रसाद भट्टराईका अनुसार नेपाल सरकारले जारी गरेको स्वास्थ्य मापदण्डलाई कडाइका साथ लागू गराउन निषेधाज्ञा जारी गरिएको हो । यसका अलवा उनले स्थानीय प्रशासन ऐन दफा २०२८ अनुसार सो आदेश जारी गरिएको बताए । निषेधाज्ञा अवधिमा बिहान १० बजेसम्म मात्र पसल सञ्चालन गर्न पाउने बताइएको छ ।
व्यापार तथा व्यवसाय सञ्चालन गर्दा बिक्रेताले पञ्जा, मास्क र स्यानिटाइजर प्रयोग गर्नु, सामाजिक दूरी कायम गर्नु र क्रेतालाई अनिवार्य रुपमा मास्क प्रयोग गर्न प्रजिअ भट्टराईले आग्रह गरे ।
धनुषामा कोरोना संक्रमितको संख्या बढ्दै गएपछि स्थानीय प्रशासनले यही साउन १९ गतेबाट शुरु गरेको एक साताको निषेधाज्ञाको अवधिलाई एक साता थप गरिएको हो ।
धनुषामा अहिलेसम्म एक हजार दुई सय ३१ जना संक्रमित छन् भने १० जनाको मृत्यु भएको छ ।त्यस्तै चार सय ४० जना सक्रिय संक्रमितमध्ये ८० जना आइसोलेसनमा रहेको बताइएको छ । त्यसैगरी, तीन सय ६० जना होम आइसोलेसनमा रहेका छन् ।
