नेपालगन्ज । कोरोना भाइरस (कोभिड–१९) संक्रमणका कारण बाँकेमा थप एकजनाको मृत्यु भएको छ ।
नेपालगन्ज उपमहानगरपालिका–५ का ६२ वर्षीय पुरुषको सोमवार राति ११ः४० बजे मृत्यु भएको जिल्ला स्वास्थ्य कार्यालय बाँकेले जानकारी दिएको छ ।
उनको फोक्सोमा निमोनिया भएको थियो । ती पुरुषलाई गत साउन ३० मा कोरोना लक्षण देखिएपछि परिवारका सदस्यले साउन ३२ मा उपचारका लागि नेपालगन्ज मेडिकल कलेज, शिक्षण अस्पताल नेपालगन्जमा गरेका थिए ।
कोरोनाको लक्षण देखिएपछि अस्पतालले पिसिआर जाँचका लागि स्वाब लिएको थियो । स्वाब लिएको दिनदेखि नै उनको स्वास्थ्यमा खराबी आएको थियो ।
सोमवार दिउँसो आएको रिपोर्टमा उनमा कोरोना संक्रमण पुष्टि भएको थियो ।
योसँगै बाँकेमा कोरोना संक्रमणबाट मृत्यु हुनेको संख्या चार पुगेको छ ।
