काठमाडौंको गोंगबुस्थित नवज्योति मार्गमा गत आइतबार बिहान फेला परेको शव दाङका कृष्णबहादुर बोहराको रहेको पुष्टि भइसकेको छ ।
बोहरा घोराही उपमहानगरपालिका वडा नम्बर ११ बगाले टोलका बासिन्दा हुन् । उनको नागरिकतामा स्थायी ठेगाना रोल्पा लेखिएको छ ।
रोल्पाबाट उनी दाङ बसाइ सराइ गरेर आएका हुन् ।
शनिबार राति उनको हत्या गरेर शव टुक्र्याएर सुटकेशमा हालेर फालिएको थियो ।
जिल्ला प्रहरी कार्यालय दाङका अनुसार बोहराका दुई श्रीमती छन् । जेठी श्रीमती उनले घोराहीमै राखेका छन् ।
पछि उनले अर्की (कान्छी) श्रीमती विवाह गरेका थिए । उनकी कान्छी श्रीमती भारतको फरिदावादमा बस्दै आएकी छिन् ।
बोहरा सात आठ वर्ष अफगानिस्तानमा काम गरेर नेपाल फर्किएका हुन् । उनी अफगानिस्तानबाट फर्किएपछि काठमाडौं आए । त्यसपछि केही समय भारत गए । फेरि काठमाडौं फर्किएर उनले कपडाको व्यवसाय सुरु गरे ।
उनी कहिलेकाहीँ दाङस्थित घरमा गइरहन्थे । पछिल्लोपटक उनी फागुनमा दाङ आएर (केहीदिन बसेर) काठमाडौं फर्किएका थिए ।
घोराही–११ का वडाध्यक्ष कुलबहादुर लामिछानेका अनुसार, कृष्णबहादुर बोहरा साविक हापुर गाविस वडा नम्बर ६ निवासी जुद्धबहादुर बोहराका कान्छा छोरा हुन् । जुद्धबहादुरको मृत्यु भइसकेको छ भने उनकी पत्नी (कृष्णबहादुरकी आमा) भने दाङमै छिन् ।
उनका दाजुभाइ रोल्पाको रुन्चगढी गाउँपालिका-६ मा बसोवास गर्दै आएका छन् । उनकी दिदी कल्पना र भिनाजु भक्तबहादुर घर्ती पनि रोल्पामै छन् ।
बोहराका चार दाजुभाइमध्ये जेठा र साईला दाजुको मृत्यु भइसकेको छ भने माईला दाजु विदेशमा छन् ।
प्रहरीका अनुसार काठमाडौं बस्ने चितवनकी कल्पना मुडवरीसँग उनको फेसबुकमार्फत सम्पर्क भएको थियो । फेसबुकमा कल्पनाको आईडी कल्पना पौड्याल छ ।
उनले आफूलाई कल्पना शाहीका नाममा पनि चिनाउने गर्दथिन् । कल्पनाले गत शनिबार राति कृष्णको हत्या गरेको प्रहरीसमक्ष बयान दिएकी छिन् ।
कल्पनाले नक्कली फेसबुक आईडी बनाएर आफूलाई दुःख दिन थालेपछि हत्या गरेको समेत बताएकी छन् ।
अन्तरंग तस्वीरहरु नक्कली फेसबुक आईडी बनाएर सार्वजनिक गर्न थालेपछि र आफूअनुकूल चल्न दबाव दिन थालेपछि हत्या गरेको वयान उनले दिएको अपराध अनुसन्धान महाशाखा प्रमुख दीपक थापाले जानकारी दिए ।
