वीरगन्ज । पर्साको वीरगञ्जस्थित नारायणी अस्पतालमा तोडफोड भएको छ ।
एक गम्भीर बिरामी (युवती) विष्णु लामालाई निजी अस्पतालले उपचार गर्न नमान्दा युवतीको मृत्यु भएपछि उनका आफन्तहरुले अस्पताल तोडफोड गरेका हुन् ।
सरकारले केही दिनअघि मात्रै यस अस्पताललाई पनि कोभिड अस्पतालमा रुपान्तरण गर्ने निर्णय गरेपछि सर्वसाधरणको आक्रोश चुलिएको थियो ।
अन्य रोगका बिरामीको निजी अस्पतालले उपचार गर्न नमानेको अवस्थामा नारायणी अस्पताललाई जनरल अस्पताल कायमै गर्नुपर्ने माग उठ्दै आएको छ ।
वीरगञ्जमा सञ्चालित नेशनल मेडिकल कलेजसहित कुनै अस्पतालले पनि ज्वरो आएकासहित कुनै पनि बिरामीको उपचार गर्न नमानेपछि सर्वसाधारणले नारायणी अस्पताललाई जनरलमा परिणत गर्नुपर्ने बताउँदै आएका छन् ।
यस्तोमा नारायणी अस्पतालको ल्याबमा गरिएको परीक्षणमा वीरगञ्ज–२ छपकैया बस्ने २० वर्षीया युवतीको पिसिआर परीक्षण रिपोर्ट पोजेटिभ आएसँगै तनाव बढेको हो ।
उनलाई वीरगञ्जका कुनै पनि निजी अस्पतालले उपचार गर्न अस्वीकार गरेका थिए । निजीले उपचार अस्वीकार गरेको अवस्थामा सरकारी अस्पताललाई जनरल बनाउन सकेमा अन्य रोगका बिरामीले यसरी मर्नु नपर्ने उनीहरुको मत छ ।
आइतवार बिहान आक्रोशित समूहले नारायणी अस्पतालमा तोडफोड गरेको अस्पतालका सुपरिटेन्डेन्ट डाक्टर मदन उपाध्यायले जानकारी दिए ।
तोडफोडबाट डा. उपाध्यायकै गाडीमा क्षति पुगेको छ। त्यसैगरी डा. उदयनारायण सिंहको गाडी पनि तोडफोड गरिएको छ ।
उक्त समूहले कोभिड–१९ को स्वाब संकलन गर्ने बुथ र सेनिटाइज गर्ने मेसिन पनि तोडफोड गरेका छन् । उनीहरुले अस्पतालमा राखिएका अन्य सामाग्रीमा पनि क्षति पुर्याएका छन् ।
ज्यान गुमाएकी ती युवतीलाई निजी अस्पतालले नलिएपछि नारायणी अस्पतालमा कोभिडको सिन्ड्रम अनुमान गरेर गण्डक कोभिड अस्पतालमा लगिएको थियो ।
नारायणीमा पछिल्लो पटक ३८ जना स्वास्थ्यकर्मी आफैं संक्रमित भइसकेका छन् । नारायणी अस्पतालले सबै सेवा दिन नसक्ने अवस्था रहेको उपाध्यायले बताए ।
यसबीचमा सरकारले वीरगञ्जमा कोरोना फैलिइसकेपछि पुनः कोभिड अस्पताल बनाउन भनेर पत्र पठाएको छ ।
वीरगञ्जमा हाल गण्डक अस्पताल र वीरगञ्ज हेल्थ केयरलाई कोभिड अस्पताल बनाइएको छ । गण्डकले थेग्न नसकेपछि वीरगञ्ज हेल्थ केयरलाई पनि कोभिड अस्पताल बनाइएको छ ।
