काठमाडौं । नेपालमा पछिल्लो २४ घण्टामा थप ४६४ जनामा कोरोना भाइरस (कोभिड–१९) संक्रमण पुष्टि भएको छ ।
शुक्रबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले देशभरका प्रयोगशालामा गरिएको परीक्षणमा थप ४६४ जनामा कोरोना पुष्टि भएको जानकारी दिए ।
योसँगै नेपालमा कोरोना संक्रमितको संख्या २२ हजार २१४ पुगेको छ ।
प्रवक्ता गौतमका अनुसार, हाल नेपालमा ६ हजार ३३० जना सक्रिय संक्रमित छन् ।
नेपालमा कोरोना संक्रमणबाट ७० जनाको मृत्यु भइसकेको छ ।
