नेपालमा कोरोनाभाइरस (कोभिड–१९) बाट कम्तीमा ३ सय ८० जना भन्दा बढी सुरक्षाकर्मी संक्रमित भएको सुरक्षा निकायका उच्च अधिकारीहरूले बताएका छन् ।

सुरक्षा निकायमध्ये कोरोनाभाइरस महामारीबाट नेपाल प्रहरी सर्वाधिक प्रभावित भएको देखिएको छ । प्रहरी प्रधान कार्यालयका अनुसार शुक्रबारसम्म २ सय ५० भन्दा बढी प्रहरी कर्मचारी कोभिड १९ बाट पीडित भएका छन् ।

त्यसैगरी नेपाली सेनामा ८५ र सशस्त्र प्रहरीमा झण्डै ८० भन्दा बढीलाई जनालाई कोराेना संक्रमण पुष्टि भएको छ । सीमा सुरक्षा, विदेशबाट आउने नेपालीहरूलाई राख्ने होल्डिङ सेन्टर तथा शव व्यवस्थापनको काममा खटिने सुरक्षाकर्मीमा कोरोनाभाइरसको संक्रमण बढेको प्रहरी तथा सेनाका उच्च अधिकारीहरूले बताएका छन् । 

प्रहरी प्रधान कार्यालय नक्सालमा कार्यारत ७२ जना प्रहरीमा कोरोना संक्रमण देखिएको छ । पछिल्लो साय थप १८ जना प्रहरीमा कोरोना संक्रमण देखिएसँगै संक्रमित हुनेहरु ९० जना पुगेका छन् । यसअघि हेर्डक्वाटरमा मात्र ५४ जनामा संक्रमण पुष्टि भएको थियो । नेपाल प्रहरीको अस्पताल महाराजगन्जमा भएको परीक्षणमा थप १८ जनाको कोरोना रिपाेर्ट पोजेटिभ आएको प्रहरीका प्रवक्ता एसएसपी कुवेर कठायतले जानकारी दिए । ‘आज थप १८ जनामा कोरोना देखिएको जानकारी आएको छ, परिक्षणको दायरा तिब्र बनाईएको छ’ एसएसपी कठायतले भने ।

बिहीवार दुई चरणमा आएको रिपोर्टमा ५४ जनामा कोरोना संक्रमण देखिएको थियो । संक्रमित सबैलाई अस्पताल भर्ना गरेर उपचार थालिएको छ । उनीहरुसँगै सम्पर्कमा आएका प्रहरीको कन्ट्याक ट्रेसिङ र स्वाब परीक्षण भइरहेको छ ।

यी बाहेक शुक्रबारमात्र महानगरीय ट्राफिक प्रहरी महाशाखामा कार्यरत दुई जना प्रहरीमा कोरोना संक्रमण देखिएको छ । शंका लागेर परीक्षण गर्दा दुई जना प्रहरीमा कोरोना पोजेटिभ देखिएको हो । यससँगै देशभर कोरोनाबाट संक्रमित प्रहरीको सङख्या २ सय ५० पुगेको छ ।

• यो पनि
• प्रहरी हेडक्वार्टरका थप २८ जनामा कोरोना संक्रमण

सशस्त्र प्रहरीमा दुई किसिमले संक्रमण

सशस्त्र प्रहरी बलका प्रवक्ता प्रहरी नायब महानिरीक्षक राजु अर्यालका अनुसार सीमा सुरक्षा तथा क्वारेन्टाइन सुरक्षामा खटिएका सशस्त्र प्रहरीमा संक्रमण देखिएको छ । नेपाल–भारत सीमा क्षेत्रमा ठूलो संख्यामा सशस्त्र प्रहरीका सुरक्षाकर्मी परिचालित छन् ।

प्रवक्ता अर्यालले नेपाल–भारत सीमा क्षेत्रमा सम्भावित संक्रमित भारतीय नागरिकसँग सम्पर्क हुने भएकाले संक्रमण सरेको हुनसक्ने बताए । उनले भने, ‘सीमामा भारतीय नागरिक नेपाल आउन खोज्छन् । त्यहाँ उनीहरूलाई रोक्नुपर्‍यो । नजिक परेपछि संक्रमण भएको भन्ने हाम्रो बुझाइ हो ।’