काठमाडौं । काठमाडौंको स्वयम्भूमा सार्वजनिक बस पल्टिदा चालकको घटनास्थलमै मृत्यु भएको छ ।
बा ४ ख ५९८४ नम्बरको संयुक्त यातायातको बस ठूलोभर्याङ र हलचोक बीचको सडकमा पल्टिँदा चालकको मृत्यु भएको प्रहरीले जनाएको छ ।
अन्दाजी २३–२४ वर्षका मृतकको सनाखत हुन नसकेको महानगरीय प्रहरी वृत्त स्वयम्भुका डिएसपी निरजन दत्त भट्टले जानकारी दिए ।
उनका अनुसार राति करिब १ बजेको दुर्घटना भएको हो । पार्किङको लागि नयाँ बसपार्कतिर लैजाँदै गर्दा बस दुर्घटना भएको अनुमान प्रहरीले गरेको छ ।
मृतक बसका चालक हुन् कि सहचालक हुन् भन्ने विषयमा अनुसन्धान भइराखेको डिएसपी भट्टले बताए ।
गाडीमा चालक एक्लै भएकाले दुर्घटनामा अन्य कोही घाइते भएका छैनन् ।