जनकपुर । धनुषा प्रहरीले लुटिएको भनिएको रकमसहित घटनामा संलग्न तीन जनालाई पक्राउ गरेको छ ।
बुधबार करिब चार लाख रुपैयाँ लुटिएको सूचनापछि प्रहरीले तीन जनालाई नियन्त्रणमा लिएको हो ।
कमला नगरपालिका–२ बस्ने २० वर्षीय धिरजकुमार अधिकारीले बैंकमा जम्मा गर्न लागेको रकम पेस्तोल देखाएर तीन लाख ७६ हजार रुपैयाँ लुटेको बताएपछि उनीसहित तीन जनालाई प्रहरीले पक्राउ गरेको हो ।
जनकपुरधाम उपमहानगरपालिका वडा–१७ स्थित कपिलेश्वर नजिक जलाद पुलमा रहेको टिभिएस सोरुममा कार्यरत तीन जनालाई नियन्त्रणमा लिएको प्रहरी नायव उपरीक्षक रामेश्वर कार्कीले जानकारी दिए ।
सोरुमको तीन लाख ७६ हजार रुपैयाँ जनकपुरको एक बैंक खातामा जम्मा गर्न आउने क्रममा धिरजले अज्ञात समुहले रकम लुटेर भागेको बताएका थिए ।
पक्राउ पर्नेमा धिरजसहित धनुषा शहिदनगर नगरपालिका–७ स्थित ताराटोल बस्ने २१ वर्षीय सुजित मण्डल र जनकपुरधाम उपमहानगरपालिका वडा नम्बर १६ बस्ने २१ वर्षीय छोटु झा छन् ।
उनीहरु तीनै जनाले सोरुमलाई झुक्याएर रकम बाडफाड गर्ने सहमती गरेको प्रहरी अनुसन्धानबाट खुलेको छ ।
प्रहरीले लुटिएको भनिएको छोटु झाको घरमा लुकाई राखेको अवस्थामा ३ लाख ५६ हजार रुपैयाँ बरामद गरेको छ ।
