काठमाडौं । सिराहाको लहान नगरपालिका–४ मा बाँध कटान हुन थालेपछि दुई गाउँ जोखिममा परेका छन् ।
सो बाँध कटान हुन थालेपछि लहान नगरपालिका–४ स्थित इस्लामपुर र सुन्दरपुर गाउँ डुबानको जोखिम परेका हुन् ।
अविरल वर्षासँगै बलान नदीमा आएको बाढीले बस्तीनजिकै कटान गर्न थालेपछि ती बस्तीमा जोखिम बढेको बताइएको छ ।
बाढीले इस्लामपुर नजिकको बाँधलाई आधा कटान गरेसँगै ती गाउँका स्थानीयवासी त्रसित बनेका छन् ।
नदीमा आएको बाढीले आफ्नो बहाव परिवर्तन गरी गाउँनजिकै बाँध कटान गर्न थालेकाले गाउँ डुबानमा पर्ने जोखिम बढ्ेको स्थानीयवासीले बताएका छन् ।
बस्ती छेउमै करिब ७० मिटर बाँध कटान भइसकेको स्थानीय मो गफुरले बताए । उनले भने, ‘जसका कारण पूरै बस्ती नै जोखिममा परेको छ, समयमै नियन्त्रण नभए ठूलै समस्या हुन सक्छ ।’
साथै, उनले तत्कालै बाँध कटान रोक्न पहल गर्नुपर्ने पनि बताए ।
यता स्थानीयवासीले सूचना दिएलग्तै कटानस्थलको निरीक्षण गरी कटान रोकथामका लागि पहल गरिरहेको लहान–४ का वडाध्यक्ष रामनाथ पण्डितले जानकारी दिए ।
यसबारे नगरप्रमुखसहित प्रहरी प्रशासनलाई जानकारी गराइसकेको वडाध्यक्ष पण्डितले बताए । दुवै बस्तीमा करिब ६२ परिवारको बसोबास छ ।