सिन्धुली अस्पतालमा एक महिलाको मृत्यु भएको छ ।
उच्च ज्वरो आउनुका साथै श्वासप्रश्वासमा समस्या भएपछि अस्पतालको इमेर्जेन्सीमा हिजो साँझ ५ बजेतिर महिलालाई भर्ना गरिएको थियो ।
घ्याङलेक गाउँपालिका १, सिम्लेकी २१ वर्षीया महिलाको साँझ ६ बजेतिर मृत्यु भएको अस्पतालका कोरोना फोकलपर्सन डा. प्रशन्न राजभण्डारीले जानकारी दिए ।
कोरोनासँग मिल्दोजुल्दो लक्षण देखिएकाले स्वाब संकलन गरी पीसीआर परीक्षणका लागि आजै काठमाडौं पठाएको डा. राजभण्डारीले जानकारी दिए ।
महोत्तरीको पाटु घर भएकी ती महिलाको माइती घ्याङ्गलेक हो ।
असार ३ गते पाटुबाट माइतीमा आएर बसेकी महिलालाई उपचारको लागि ल्याउन ढिला हुँदा मृत्यु भएको चिकित्सकको भनाइ छ ।
मृतकको पीसीआर रिपोर्ट नआएसम्म उनको सम्पर्कमा रहेका आफन्त र उपचारमा संलग्न चिकित्सक लगायत कर्मचारीलाई क्वारेन्टाइनमा बस्न भनिएको छ ।
