ललितपुर । ललितपुरको पाटन अस्पतालमा उपचाररत बिरामीको कोरोना संक्रमणका कारण मृत्यु भएको छ ।
कोरोना संक्रमणबाट ५० वर्षीय पुरुषको आज मृत्यु भएको जिल्ला जनस्वास्थ्य कार्यालय ललितपुरका प्रमुख डा. खगेश्वर गेलालले जानकारी दिए । उनी मिर्गौलाका बिरामी रहेको बताइएको छ ।
मिर्गौला रोगबाट बिरामी ती पुरुष अस्पतालमा भर्ना भएका थिए । अस्पताल भर्ना भएलगत्तै कोरोना परीक्षण गर्दा उनमा संक्रमण पुष्टि भएको थियो ।
उपचारका क्रममा उनको मृत्यु भएको डा. गेलालले बताए । उनी ललितपुर महालक्ष्मी नगरपालिकामा बस्दै आएका थिए । उनी चितवन स्थायी ठेगाना भएका व्यक्ति हुन् ।
नेपाली सेनाले उनको अन्त्येष्टिको तयारी गरेको छ ।
