काठमाडौं । सोमबारसम्म नेपालमा कोरोना भाइरस (कोभिड–१९) संक्रमितको संख्या साढे ९ हजार नाघिसकेको छ ।
स्वास्थ्य तथा जनसंख्या मन्त्रालयका अनुसार, गएको २४ घण्टामा नेपालमा थप ५३५ संक्रमित थपिएका छन् । योसँगै नेपालमा कोरोना संक्रमितको संख्या ९ हजार ५६१ पुगेको छ ।
स्वास्थ्य मन्त्रालयका अनुसार, देशका ७७ जिल्लामध्ये अहिलेसम्म ७६ जिल्लामा कोरोना संक्रमण देखिइसकेको छ ।
अहिलेसम्म कोरोना संक्रमणबाट बच्न सफल जिल्ला रसुवा मात्र भएको छ ।
यसअघि ओखलढुङ्गामा पनि कोरोना संक्रमण देखिएको थिएन तर, स्वास्थ्य मन्त्रालयको पछिल्लो अपडेटमा ओखलढुङ्गाका २८ वर्षीय पुरुषमा समेत कोरोना संक्रमण पुष्टि भएसँगै कोरोना संक्रमण नदेखिएको जिल्ला रसुवा मात्र भएको छ ।
त्यस्तै आइतबार मुस्ताङमा पनि एक जनामा कोरोना संक्रमण पुष्टि भएको थियो ।
