सुर्खेत । वीरेन्द्रनगरस्थित कर्णाली प्रदेश अस्पतालमा कार्यरत पाँचजना स्वास्थ्यकर्मीमा कोरोना भाइरस (कोभिड–१९) संक्रमण पुष्टि भएको छ ।
गत जेठ ३१ गतेदेखि असार ३ गतेसम्म प्रदेश अस्पतालको आकस्मिक कक्षमा उपचार गराइरहेका ३ जना बिरामीमा कोरोना पोजेटिभ देखिएपछि उनीहरुको सम्पर्कमा आएका स्वास्थ्यकर्मी तथा कर्मचारीसहित ४५ जनालाई क्वारेन्टाइनमा राखिएको थियो ।
ती ४५ जनाको स्वाब परीक्षण गर्दा पाँच जनालाई कोरोना संक्रमण पुष्टि भएको हो ।
प्रदेश अस्पतालका कोरोना फोकल पर्सन डा. केएन पौडेलले अस्पतालको ल्याबमा कार्यरत ल्याब असिस्टेन्टसहित चारजना र एकजना एक्सरेमा कार्यरत कर्मचारीमा कोरोना संक्रमण देखिएको जानकारी दिए ।
कोरोना संक्रमित पाँच जनालाई आईसोलेसनमा राखिएको छ ।
अस्पतालका स्वास्थ्यकर्मी नै आईसोलेसन र क्वारेन्टाइनमा बस्नु परेपछि अस्पतालका सेवा प्रभावित भएको छ ।
यसअघि पनि सुर्खेतकै चिङ्गाड गाँउपालिका दुईजना स्वाथ्यकर्मीमा पनि कोरोना पोजेटिभ देखिएको थियो ।
