पाल्पा । पाल्पामा छोरीलाई बलात्कार गरेको आरोपमा बुवा पक्राउ परेका छन् । ३१ वर्षीया छोरीलाई बलात्कार गरेको आरोपमा ५९ वर्षीय बुवालाई पक्राउ गरेको जिल्ला प्रहरी कार्यालय पाल्पाका सूचना अधिकारी प्रहरी निरीक्षक सुरज श्रेष्ठले जानकारी दिए ।
उनलाई शुक्रबार पक्राउ गरिएको हो। आइतबार जबरजस्ती करणीसम्बन्धी मुद्दा दर्ता गरी घटनाबारे थप अनुसन्धान हुने प्रहरी निरीक्षक श्रेष्ठले बताए । अविवाहित छोरीलाई डरधम्की देखाई पटकपटक बलात्कार गर्दै आएको प्रारम्भिक अनुसन्धानमा खुलेको उनले बताए । घटनाबारे कसैलाई भने मार्ने धम्की दिंदै आएको पीडितले प्रहरीमा दिएको जाहेरीमा उल्लेख छ ।
अभियुक्त बुवालाई अहिले जिल्ला प्रहरी कार्यालय पाल्पाको हिरासतमा राखिएको छ। यौन दुर्व्यवहारको आरोपमा वृद्ध पक्राउ पाल्पामै १३ वर्षीया बालिकालाई यौन दुर्व्यवहार गरेको आरोपमा एक वृद्ध पक्राउ परेका छन्। पक्राउ पर्नेमा ७६ वर्षीय कुलबहादुर राना रहेको प्रहरी निरीक्षक श्रेष्ठले बताए ।
उनका अनुसार असार ४ को अपराह्न ४ बजेतिर ती बालिकाको संवेदनशील अंगमा समाई यौन दुर्व्यवहार गरेको जाहेरीमा उल्लेख छ। शुक्रबार पक्राउ गरी अभियुक्त रानालाई जिल्ला प्रहरी कार्यालय पाल्पाको हिरासतमा राखिएको छ।
बाल यौन दुर्व्यवहारसम्बन्धी मुद्दा दर्ता गर्ने तयारी भइरहेको प्रहरी निरीक्षक श्रेष्ठले बताए। आइतबार मुद्दा दर्ता गरी थप अनुसन्धान हुने उनले बताए ।
